🚜 मोठी दिलासादायक कारवाई! ✅ सोयगाव तहसील प्रशासनाने मोकळे केले अनेक वर्षांपासून बंद शेतरस्ते

SARDAR NETWORK 24×7 – DAINIK LATEST NEWS (सच आपकी जुबानी)  📍 सोयगाव प्रतिनिधी  | अप्पा वाघ

सोयगाव तालुक्यातील विविध गावांमध्ये अनेक वर्षांपासून बंद असलेल्या शेतरस्त्यांवर अखेर महसूल प्रशासनाने मोठी कारवाई करत शेतकऱ्यांना दिलासा दिला आहे. तहसीलदार मनिषा मेने यांच्या आदेशाने व मार्गदर्शनाखाली महसूल विभागाने पुढाकार घेत विविध ठिकाणी अडवून ठेवलेले शेतरस्ते मोकळे केले.

या कारवाईमुळे सुमारे ३० ते ३५ शेतकऱ्यांना थेट लाभ मिळणार असून, शेतीकामासाठीचा मार्ग आता सुकर झाला आहे. प्रशासनाच्या या धाडसी निर्णयामुळे शेतकरी वर्गातून समाधान व्यक्त केले जात आहे.

🌾 जरंडी येथे दोन ते तीन वर्षांपासून बंद रस्ता खुला

मिळालेल्या माहितीनुसार, जरंडी येथील गट क्रमांक १२३ मधील खातेदार अमरसिंग हिरालाल परदेशी यांचा दोन ते तीन वर्षांपासून अडवून ठेवलेला शेतरस्ता मामलेदार न्यायालय अधिनियम १९०६ च्या कलम ५ अंतर्गत प्राप्त आदेशानुसार महसूल प्रशासनाने खुला केला.

तसेच सोयगाव येथील गोपाल चौधरी व त्र्यंबक चौधरी यांच्या मालकीच्या गट क्रमांक ४० मध्ये जाणारा रस्ताही प्रशासनाने मोकळा केला.

🚜 वेताळवाडी आणि धनवटमध्येही प्रशासनाची धडक कारवाई

वेताळवाडी येथील गट क्रमांक ४३ मधील देविदास विष्णू सोनवणे आणि सिद्धार्थ विष्णू सोनवणे यांच्या शेतात जाणारा मार्ग अनेक दिवसांपासून बंद होता. महसूल विभागाने हस्तक्षेप करत हा मार्गही खुला केला.

यानंतर धनवट येथील गट क्रमांक ७३/अ मधील मुलचंद झिपरू जाधव यांच्या शेतात जाणारा तब्बल दोन वर्षांपासून बंद असलेला रस्ता प्रशासनाने मोकळा करून दिला.

👨‍🌾 शेतकऱ्यांमध्ये समाधान; प्रशासनाचे कौतुक

शेतरस्ते बंद असल्यामुळे शेतकऱ्यांना शेतीमाल वाहतूक, मशागत आणि दैनंदिन शेतीकामासाठी मोठ्या अडचणींचा सामना करावा लागत होता. अखेर तहसील प्रशासनाने पुढाकार घेत कारवाई केल्याने शेतकऱ्यांमध्ये समाधानाचे वातावरण निर्माण झाले आहे.

या कारवाईवेळी नायब तहसीलदार संभाजी देशमुख, मंडळ अधिकारी अरुण पंडीत, कल्पना डिघोळे, ग्राम महसूल अधिकारी वैभव जाधव, संतोष राऊत, शिल्पा बोपटे, भगवान सोळुंके तसेच महसूल सेवक संभाजी बोरसे उपस्थित होते.