🚨 पत्रकारांचा अपमान सहन केला जाणार नाही! खासदार संजय पाटील यांच्या कथित वक्तव्याविरोधात अमळनेर पत्रकार संघ आक्रमक

SARDAR NETWORK 24×7 – DAINIK LATEST NEWS (सच आपकी जुबानी) 📍 अमळनेर तालुका | प्रतिनिधी (मुन्ना शेख)

खासदार संजय दीना पाटील यांनी माध्यम प्रतिनिधी व पत्रकारांविषयी कथितरित्या अवमानकारक भाषा वापरत मारहाणीची धमकी दिल्याचा आरोप करत अमळनेर शहर व तालुका पत्रकार संघाच्या वतीने तीव्र निषेध व्यक्त करण्यात आला. या प्रकरणी अमळनेर पोलीस ठाण्यात निवेदन देत संबंधित वक्तव्याची दखल घेऊन योग्य ती कार्यवाही करण्याची मागणी करण्यात आली.

हे निवेदन मुख्यमंत्री तथा गृहमंत्री देवेंद्र फडणवीस यांना अमळनेर पोलीस निरीक्षकांमार्फत पाठविण्यात आले असून, त्याच्या प्रती उपमुख्यमंत्री एकनाथ शिंदे, जिल्हाधिकारी, जळगाव आणि पोलीस अधीक्षक, जळगाव यांनाही देण्यात आल्या आहेत. अमळनेर पोलीस ठाण्याचे पोलीस निरीक्षक दत्तात्रय निकम यांनी हे निवेदन स्वीकारले.

🖋️ “पत्रकारांचा अवमान म्हणजे अभिव्यक्ती स्वातंत्र्यावर आघात”

पत्रकार संघाने निवेदनात म्हटले आहे की, खासदार संजय पाटील यांनी पत्रकारांशी अरेरावीची भाषा वापरत कथितरित्या अवमानकारक व धमकीजनक वक्तव्य केले आहे. पत्रकार हा लोकशाहीचा चौथा स्तंभ असून समाजातील सत्य परिस्थिती जनतेसमोर मांडणे, लोकहिताचे प्रश्न उजेडात आणणे आणि प्रशासनाला जबाबदार धरणे हे त्यांचे महत्त्वाचे कर्तव्य आहे.

अशा परिस्थितीत पत्रकारांचा अवमान करणे म्हणजे भारतीय संविधानाने दिलेल्या अभिव्यक्ती स्वातंत्र्याच्या अधिकारावर अप्रत्यक्षपणे आघात असल्याचे निवेदनात नमूद करण्यात आले आहे.

⚖️ जाहीर माफी आणि कारवाईची मागणी

पत्रकार संघाने या प्रकरणात खासदार संजय पाटील यांनी पत्रकारांची जाहीर व बिनशर्त माफी मागावी, तसेच पत्रकारांविषयी करण्यात आलेल्या कथित अवमानकारक व धमकीजनक वक्तव्याची योग्य ती दखल घेऊन आवश्यक कार्यवाही करावी, अशी मागणी केली आहे.

यासोबतच भविष्यात कोणत्याही लोकप्रतिनिधीकडून पत्रकारांच्या सन्मानाला धक्का पोहोचेल असे वक्तव्य किंवा कृत्य होणार नाही, यासाठी प्रशासनाने दक्षता घ्यावी, अशीही मागणी करण्यात आली आहे.

✊ आंदोलनाचा इशारा

पत्रकार संघाने आपल्या निवेदनात स्पष्ट केले आहे की, पत्रकारांच्या स्वाभिमान व सन्मानाच्या रक्षणासाठी संघ कटिबद्ध असून, आवश्यकता भासल्यास लोकशाही मार्गाने आंदोलन करण्याचा अधिकार राखून ठेवण्यात आला आहे.

👥 निवेदनावेळी उपस्थित

यावेळी अमळनेर शहर व तालुका पत्रकार संघाचे अध्यक्ष चेतन राजपूत, ज्येष्ठ पत्रकार पांडुरंग पाटील, संजय पाटील, जितेंद्र ठाकूर, महेंद्र पाटील, बाबूलाल पाटील, हिरालाल पाटील, डॉ. विलास पाटील, संभाजी देवरे, संदीप सोनवणे, डॉ. युवराज पाटील, विजय पाटील, महेंद्र रामोशे, विक्की जाधव, कुंदन खैरनार, मुन्ना शेख, रविंद्र मोरे, काशिनाथ चौधरी यांच्यासह अनेक पत्रकार उपस्थित होते.