🚨🐕 एसआरआय मोहिमेदरम्यान BLO वर मोकाट कुत्र्यांचा भीषण हल्ला!

SARDAR NETWORK 24×7 – DAINIK LATEST NEWS (सच आपकी जुबानी) 📍सोयगाव तालुका | प्रतिनिधी : आप्पा वाघ

शासनाच्या एसआरआय (Special Intensive Revision) मोहिमेंतर्गत मतदार यादी अद्ययावत करण्यासाठी गृहभेटी देत अर्जांचे वितरण करणाऱ्या बीएलओ (Booth Level Officer) वर मोकाट कुत्र्यांनी अचानक हल्ला चढवून गंभीर जखमी केल्याची धक्कादायक घटना शुक्रवारी सकाळी सुमारे ११ वाजण्याच्या सुमारास पिंपरी (माळेगाव), ता. सोयगाव येथे घडली. या घटनेमुळे संपूर्ण तालुक्यात खळबळ उडाली असून मोकाट कुत्र्यांच्या वाढत्या त्रासाचा प्रश्न पुन्हा ऐरणीवर आला आहे.

कुत्र्यांच्या हल्ल्यात जखमी झालेले महादू पांडुरंग पंडित (वय ३८) हे शिक्षक असून ते संबंधित मतदान केंद्राचे बीएलओ म्हणून कार्यरत आहेत. एसआरआय मोहिमेंतर्गत मतदारांना अर्ज वाटप करण्यासाठी आणि घराघरात भेटी देत माहिती संकलित करण्याचे काम सुरू असताना गावातील काही मोकाट कुत्र्यांनी त्यांना घेरले आणि अचानक हल्ला करत शरीराच्या विविध भागांवर चावे घेत गंभीर जखमी केले.

घटनेनंतर परिसरातील ग्रामस्थांनी तातडीने धाव घेत त्यांची सुटका केली आणि सोयगाव ग्रामीण रुग्णालयात उपचारासाठी दाखल केले. त्यांच्यावर वैद्यकीय उपचार सुरू असून प्रकृतीवर डॉक्टरांकडून लक्ष ठेवण्यात येत आहे.

🐾 मोकाट कुत्र्यांचा वाढता उच्छाद; नागरिकांमध्ये भीतीचे वातावरण

सोयगाव तालुक्यात मोकाट तसेच पिसाळलेल्या कुत्र्यांचा त्रास दिवसेंदिवस वाढत असल्याची तक्रार नागरिकांकडून सातत्याने केली जात आहे. काही भागात अज्ञात व्यक्ती रात्रीच्या वेळी वाहनातून मोकाट कुत्रे आणून सोडत असल्याचा आरोपही स्थानिक नागरिकांनी केला आहे.

काही दिवसांपूर्वीही शाळेतून घरी परतणाऱ्या सात वर्षीय विद्यार्थिनीवर मोकाट कुत्र्यांनी हल्ला करून तिला गंभीर जखमी केले होते. तरीही संबंधित प्रशासनाने ठोस उपाययोजना न केल्याची नाराजी नागरिकांमधून व्यक्त होत आहे.

⚠️ पोलिसांनी आधीच दिला होता इशारा

विशेष म्हणजे, यापूर्वी घडलेल्या घटनांची दखल घेत सोयगाव पोलिसांनी गटविकास अधिकारी, सोयगाव यांना लेखी पत्र देऊन मोकाट कुत्र्यांच्या बंदोबस्तासाठी आवश्यक उपाययोजना करण्याच्या सूचना दिल्या होत्या. मात्र, त्या सूचनांची प्रभावी अंमलबजावणी झालेली नसल्याचे या घटनेवरून स्पष्ट होत असल्याची चर्चा नागरिकांमध्ये आहे.

📢 तातडीने कारवाईची मागणी

या घटनेनंतर सोयगाव तालुक्यातील नागरिकांनी प्रशासनाने तातडीने मोकाट कुत्र्यांचा बंदोबस्त करावा, नियमित पकडमोहीम राबवावी आणि नागरिकांच्या सुरक्षिततेसाठी प्रभावी उपाययोजना कराव्यात, अशी जोरदार मागणी केली आहे. विशेषतः शालेय विद्यार्थी, शिक्षक, शासकीय कर्मचारी आणि सर्वसामान्य नागरिकांच्या सुरक्षेच्या दृष्टीने त्वरित पावले उचलण्याची गरज व्यक्त केली जात आहे.