🚜💧 ६५ कोटींच्या बंदिस्त नलिका योजनेला गती; पद्मालय-२ उपसा सिंचन प्रकल्पाची आमदार अमोल पाटील यांची पाहणी

SARDAR NETWORK 24×7 – DAINIK LATEST NEWS (सच आपकी जुबानी) 📍एरंडोल तालुका | प्रतिनिधी : राजधर महाजन

एरंडोल तालुक्यातील शेतकऱ्यांसाठी अत्यंत महत्त्वाचा ठरणाऱ्या साठवण तलाव पद्मालय (पद्मालय धरण-२) उपसा सिंचन योजनेची आज आमदार ॲड. अमोलदादा पाटील यांनी प्रत्यक्ष क्षेत्रीय पाहणी करून प्रकल्पाच्या कामांचा सविस्तर आढावा घेतला. सिंचन क्षमतेत मोठी वाढ घडवून आणणाऱ्या या महत्त्वाकांक्षी प्रकल्पाची कामे वेळेत आणि दर्जेदार पद्धतीने पूर्ण करण्याच्या सूचना त्यांनी संबंधित अधिकारी व कंत्राटदारांना दिल्या.

या योजनेअंतर्गत १९८२ हेक्टर क्षेत्रासाठी बंदिस्त नलिका वितरण प्रणाली उभारण्याकरिता ६५ कोटी रुपयांचा निधी आमदार अमोल पाटील यांच्या सातत्यपूर्ण पाठपुराव्यामुळे मंजूर झाला आहे. सर्व प्रशासकीय प्रक्रिया पूर्ण झाल्यानंतर प्रत्यक्ष कामांना वेग देण्यासाठी त्यांनी अधिकाऱ्यांसह प्रकल्पस्थळी भेट देत प्रगतीची पाहणी केली.

💦 ९ हजार हेक्टर शेती सिंचनाखाली येणार

यावेळी तापी पाटबंधारे विकास महामंडळाचे अधीक्षक अभियंता गोकुळ महाजन यांनी प्रकल्पाची माहिती देताना सांगितले की, ७०.३६ दशलक्ष घनमीटर पाणीसाठा करण्याची क्षमता असलेल्या या योजनेमुळे एरंडोल आणि धरणगाव तालुक्यातील ३३ गावांतील सुमारे ९,००० हेक्टर शेती सिंचनाखाली येणार आहे.

त्यापैकी सुमारे २,००० हेक्टर क्षेत्राला आधुनिक बंदिस्त नलिका वितरण प्रणालीद्वारे, तर उर्वरित ७,००० हेक्टर क्षेत्राला गिरणा प्रकल्पाच्या विद्यमान उघड्या कालवा व्यवस्थेद्वारे सिंचन सुविधा उपलब्ध होणार आहे.

🏗️ धरणाचे ९० टक्के काम पूर्ण

प्रकल्पाअंतर्गत गिरणा नदीवरील दहिगाव बंधाऱ्यातून पावसाळ्यात पाणी उपसा करून ते पद्मालय गावाजवळील नव्या माती धरणात साठविण्यात येणार आहे. या धरणाची लांबी २,२०० मीटर तर कमाल उंची ३८.३८ मीटर आहे.

सध्या माती धरणाचे सुमारे ९० टक्के काम पूर्ण झाले असून पंपगृह, उपसा प्रणाली आणि वितरण व्यवस्थेची उर्वरित कामे वेगाने सुरू असल्याची माहिती अधिकाऱ्यांनी दिली.

⚡ एका वर्षात प्रकल्प पूर्ण करण्याचे निर्देश

यावेळी आमदार अमोल पाटील यांनी बंदिस्त नलिका वितरण प्रणाली, वितरण जाळे, रस्ता क्रॉसिंग, नाला क्रॉसिंग, पाणी वापर संस्था इमारती तसेच इतर अनुषंगिक कामांची पाहणी केली.

कामाचा दर्जा कायम ठेवत येत्या एका वर्षात संपूर्ण प्रकल्प पूर्ण करण्याचे नियोजन करावे, अशा स्पष्ट सूचना त्यांनी अधिकाऱ्यांना दिल्या. शेतकऱ्यांना या योजनेचा लाभ लवकर मिळावा यासाठी प्रत्येक टप्प्यावर काटेकोर नियोजन करून वेळेत काम पूर्ण करण्यावर त्यांनी विशेष भर दिला.

💰 प्रकल्पाला १,०७२.४५ कोटींची प्रशासकीय मान्यता

अधिकाऱ्यांनी यावेळी प्रकल्पाला १,०७२.४५ कोटी रुपयांची द्वितीय सुधारित प्रशासकीय मान्यता प्राप्त झाल्याची माहिती दिली. यानंतर आमदार पाटील यांनी धरणाची घळभरणी, उपसा प्रणाली, बंदिस्त वितरण व्यवस्था तसेच उर्वरित सर्व कामांना अधिक गती देऊन चालू वर्षात महत्त्वाचे टप्पे पूर्ण करण्याचे निर्देश दिले.

🌱 शेतकऱ्यांना होणार मोठा फायदा

या योजनेमुळे आधुनिक बंदिस्त नलिका वितरण प्रणालीद्वारे पाण्याची नासाडी कमी होणार, पाणी थेट शेतापर्यंत पोहोचणार असल्याने गळती व बाष्पीभवन कमी होईल आणि कमी पाण्यात अधिक क्षेत्र सिंचनाखाली आणणे शक्य होणार आहे.

यामुळे शेतकऱ्यांचा वेळ, श्रम आणि सिंचन खर्च कमी होण्याबरोबरच पिकांचे उत्पादन वाढणार, वर्षभर विविध पिके घेणे शक्य होणार असून शेतकऱ्यांच्या उत्पन्नातही वाढ होणार आहे. शेती अधिक आधुनिक, शाश्वत आणि जलसंपन्न करण्याच्या दृष्टीने हा प्रकल्प एरंडोल व धरणगाव परिसराच्या कृषी विकासासाठी मैलाचा दगड ठरणार असल्याचा विश्वास यावेळी व्यक्त करण्यात आला.

👥 यावेळी उपस्थित

या पाहणी दौऱ्यात तापी पाटबंधारे विकास महामंडळाचे अधीक्षक अभियंता गोकुळ महाजन, कार्यकारी अभियंता उत्तम दाभाडे, उपअभियंता आरती सुर्यवंशी, कंत्राटदार मनोज शर्मा, प्रतिनिधी कुणाल बोरसे, अभियांत्रिकी सहाय्यक अमोल सुर्यवंशी, माजी जिल्हा परिषद सदस्य भिकाभाऊ कोळी, युवासेना माजी तालुकाप्रमुख बबलूदादा पाटील, युवासेना तालुकाप्रमुख कमलेश पाटील, टोळीचे सरपंच बाळासाहेब पाटील, रिंगणगावचे सरपंच आबा मते, गालापूरचे सरपंच आरिफदादा, खडके बु. येथील गोटू पाटील तसेच संबंधित अधिकारी व पदाधिकारी उपस्थित होते.