🚨 निपाणेत स्मशानभूमी बांधकामावरून वाद पेटला!

SARDAR NETWORK 24×7 – DAINIK LATEST NEWS (सच आपकी जुबानी)📍एरंडोल तालुका | प्रतिनिधी : राजधर महाजन

एरंडोल तालुक्यातील निपाणे गावात सुरू असलेल्या स्मशानभूमीच्या बांधकामावरून मोठा वाद निर्माण झाला असून, ग्रामस्थांनी संबंधित काम तात्काळ थांबविण्याची मागणी करत गटविकास अधिकारी, पंचायत समिती एरंडोल यांना निवेदन सादर केले आहे. ग्रामस्थांच्या मते, कोणताही ग्रामसभा ठराव किंवा ग्रामपंचायतीचा अधिकृत ठराव न घेता हे बांधकाम सुरू करण्यात आल्याने गावात तीव्र नाराजीचे वातावरण निर्माण झाले आहे.

ग्रामस्थांनी दिलेल्या निवेदनात नमूद केल्याप्रमाणे, गावातील विद्यमान स्मशानभूमी सुस्थितीत असतानाही ती कोणतीही अधिकृत परवानगी किंवा शासनाचा आदेश नसताना पाडण्यात आली. त्यानंतर त्याच जागेवर नवीन बांधकाम सुरू करण्यात आल्याचा गंभीर आरोप संबंधित ठेकेदारावर करण्यात आला आहे.

🛑 “ग्रामस्थांना विश्वासात न घेता काम सुरू”

ग्रामस्थांचे म्हणणे आहे की, स्मशानभूमीसारख्या संवेदनशील विषयावर ग्रामसभेची मंजुरी घेणे आवश्यक असताना प्रशासनाने तसे केले नाही. गावकऱ्यांना विश्वासात न घेता थेट बांधकाम सुरू करण्यात आल्याने नागरिकांमध्ये संतापाची भावना निर्माण झाली आहे.

🏗️ पर्यायी जागा उपलब्ध असतानाही जुन्याच जागेवर बांधकाम?

निवेदनात ग्रामस्थांनी असा दावा केला आहे की, ग्रामपंचायतीच्या मालकीच्या गट क्रमांक २७ मध्ये जुन्या स्मशानभूमीपासून सुमारे १०० मीटर अंतरावर पर्यायी जागा उपलब्ध आहे. तरीदेखील त्याच जुन्या जागेवरच बांधकाम करण्याचा आग्रह धरला जात असल्याचा आरोप करण्यात आला आहे. तसेच ग्रामसेवकांनी दिलेल्या सूचनांकडेही दुर्लक्ष करण्यात आल्याचे ग्रामस्थांचे म्हणणे आहे.

🔍 चौकशी करून काम थांबविण्याची मागणी

या संपूर्ण प्रकरणाची सखोल चौकशी करून संबंधित बांधकाम तात्काळ थांबविण्यात यावे, तसेच कायदेशीर प्रक्रियेचे पालन करूनच पुढील निर्णय घ्यावा, अशी मागणी ग्रामस्थांनी केली आहे.

या निवेदनावर कमलाकर पाटील, उमेश महाजन, राहुल भारी, प्रमोद पाटील, अर्जुन माळी, विशाल पाटील, पंकज पाटील, संजय पाटील यांच्यासह अनेक ग्रामस्थांच्या स्वाक्षऱ्या आहेत.

👉 आता या प्रकरणात पंचायत समिती व प्रशासन काय भूमिका घेते, याकडे संपूर्ण निपाणे ग्रामस्थांचे लक्ष लागले आहे.