🚨 रेल्वे टीटीईवर प्रवाशाचा जीवघेणा हल्ला!👊😱

SARDAR NETWORK 24×7 – DAINIK LATEST NEWS (सच आपकी जुबानी) 📍 भुसावळ मंडळ विशेष | प्रतिनिधी

भुसावळ रेल्वे स्थानकावर ड्युटीवर असलेल्या रेल्वेच्या टीटीईवर (Travelling Ticket Examiner) एका प्रवाशाने हल्ला केल्याची धक्कादायक घटना शनिवारी (दि. 27 जून) रात्री घडली. एसी कोचमध्ये जागा उपलब्ध नसल्याचे सांगितल्याचा राग मनात धरून आरोपीने टीटीईला शिवीगाळ करत मारहाण केली. या हल्ल्यात टीटीईच्या डोळ्याखाली गंभीर दुखापत होऊन रक्तस्राव झाला असून सरकारी टॅब, चष्मा, ईएफटी बुक आणि सोन्याच्या चैनसह सुमारे ₹88 हजारांचे नुकसान झाल्याचे फिर्यादीत नमूद करण्यात आले आहे.

लोहमार्ग पोलिसांनी या प्रकरणी मनीष लक्ष्मणदास शंभानी (वय 36, रा. शिंधी कॉलनी, भुसावळ) याच्याविरुद्ध भारतीय न्याय संहिता (BNS) अंतर्गत विविध गंभीर कलमांन्वये गुन्हा दाखल केला आहे.

🚉 नेमके काय घडले?

फिर्यादी चुन्नीलाल रमेशचंद्र गुप्ता (वय 49) हे भुसावळ येथे हेड टीटीई म्हणून कार्यरत आहेत. शनिवारी रात्री त्यांची नागपूर–मडगाव एक्सप्रेस (गाडी क्र. 11203) मध्ये भुसावळ ते पनवेल दरम्यान एसी कोच तपासणीची ड्युटी होती.

रात्री सुमारे 10.20 वाजता गाडी भुसावळ स्थानकाच्या प्लॅटफॉर्म क्रमांक 3 वर आल्यानंतर आरोपी त्यांच्याकडे आला आणि एसी कोचमध्ये जागा देण्याची मागणी केली. मात्र, ट्रेनमध्ये आरएसी असल्यामुळे जागा उपलब्ध नसल्याचे टीटीईने सांगितले.

यामुळे संतप्त झालेल्या आरोपीने प्रथम अश्लील भाषेत शिवीगाळ केली. त्यानंतर एका प्रवाशाशी टीटीई बोलत असताना आरोपीने अचानक त्यांच्या उजव्या गालावर व डोळ्याखाली जोरदार ठोसा मारला तसेच छाती व बरगड्यांवरही मारहाण केल्याचे फिर्यादीत म्हटले आहे.

😡 हल्ल्यानंतर रक्तस्राव; सरकारी साहित्याचे नुकसान

मारहाणीमुळे टीटीईच्या डोळ्याखाली जखम होऊन रक्तस्राव सुरू झाला. धक्काबुक्कीमध्ये त्यांच्या हातातील बॅग खाली पडली. त्यामध्ये असलेला सरकारी टॅबलेट, ईएफटी बुक, चष्मा, ओळखपत्र आणि गळ्यातील सोन्याची चैन यांचे मिळून सुमारे ₹88 हजारांचे नुकसान झाल्याचे फिर्यादीत नमूद आहे.

🚔 आरपीएफ जवानांनी आरोपीला पकडले

घटनेची माहिती मिळताच साध्या व गणवेशातील आरपीएफ जवानांनी घटनास्थळी धाव घेत आरोपीला ताब्यात घेतले. मात्र, आरोपीने स्वतःचे टी-शर्ट फाडून “मेरा बायपास हुआ है” असा आरडाओरडा करत पळून जाण्याचाही प्रयत्न केल्याचे एफआयआरमध्ये नमूद आहे. त्यानंतर त्याला रेल्वे पोलिसांच्या ताब्यात देण्यात आले.

⚖️ गंभीर कलमांखाली गुन्हा दाखल

लोहमार्ग पोलीस ठाणे, भुसावळ येथे आरोपीविरुद्ध भारतीय न्याय संहिता (BNS) 2023 अंतर्गत कलम 115(2), 132, 324(4), 351(2) आणि 352 अन्वये गुन्हा दाखल करण्यात आला असून पुढील तपास पोलीस हवालदार धनराज सुधाकर लुले करीत आहेत.