🌪️🍌 रावेर तालुक्यावर दुहेरी संकट! ⚠️ सलग दुसऱ्यांदा वादळी पावसाचा तडाखा; शेकडो एकर केळी पीक जमीनदोस्त

SARDAR NETWORK 24×7 – DAINIK LATEST NEWS (सच आपकी जुबानी) 📍 📍 सावदा प्रतिनिधी | मुबारक तडवी

मान्सूनच्या आगमनापूर्वीच रावेर तालुक्यावर नैसर्गिक संकट कोसळले असून अवघ्या आठवडाभरात सलग दुसऱ्यांदा वादळी वाऱ्यासह मुसळधार पावसाने केळी उत्पादक शेतकऱ्यांचे मोठे नुकसान केले आहे. या अवकाळी संकटामुळे शेतकऱ्यांच्या तोंडाशी आलेला घास हिरावला गेला असून संपूर्ण परिसरात हळहळ व्यक्त होत आहे.

🌧️ वादळी वाऱ्यासह जोरदार पावसाचा कहर

सोमवारी सायंकाळी सुमारे ६ वाजेच्या दरम्यान रावेर तालुक्यातील पूर्व भागात अचानक वातावरण बदलले आणि जोरदार वादळी वाऱ्यासह पावसाने धुमाकूळ घातला. जवळपास एक तास सुरू असलेल्या या वादळामुळे अनेक गावांतील शेकडो एकरवरील केळीच्या बागा अक्षरशः जमीनदोस्त झाल्या.

📌 या गावांना मोठा फटका

मोठा वाघोदा बुद्रुक, सावदा, रसलपूर, केऱ्हाळा, भोकरी, अहिरवाडी पाडला, निरूळ, खानापूर, चोरवड, अजनाड, आठवडा, नेहता दोधा, नेहता तसेच तापीकिनारपट्टी भागात वादळाचा मोठा तडाखा बसला.

याशिवाय सावखेडा, खिरोदा, धामोडी, कांडवेल आणि आसपासच्या परिसरातही मोठ्या प्रमाणावर केळी पिकांचे नुकसान झाले आहे.

🍌 कोट्यवधींचे नुकसान; शेतकरी चिंतेत

रावेर तालुका हा जिल्ह्यातील प्रमुख केळी पट्टा म्हणून ओळखला जातो. मात्र पुन्हा एकदा आलेल्या वादळी पावसामुळे केळीच्या पिकांचे कोट्यवधी रुपयांचे नुकसान झाल्याचा प्राथमिक अंदाज व्यक्त केला जात आहे.

वादळी वाऱ्याच्या तडाख्याने अनेक केळीची झाडे मुळासकट कोसळली असून शेतकऱ्यांचे आर्थिक गणित पूर्णपणे विस्कळीत झाले आहे. आधीच वाढलेला उत्पादन खर्च, हवामानातील बदल आणि बाजारातील अनिश्चितता यामुळे अडचणीत सापडलेल्या शेतकऱ्यांपुढे आता मोठे संकट उभे राहिले आहे.

🌳 झाडे उन्मळून पडली; वाहतूकही ठप्प

वादळामुळे काही ठिकाणी मोठी झाडे उन्मळून पडल्याने काही काळ वाहतूक व्यवस्थाही विस्कळीत झाली होती. ग्रामस्थांनी आणि स्थानिक प्रशासनाने तत्काळ मदतकार्य सुरू करून रस्ते मोकळे केले.

📝 महसूल व कृषी विभागाकडून पंचनामे सुरू

वादळानंतर महसूल आणि कृषी विभागाने नुकसानग्रस्त भागाची पाहणी सुरू केली असून पंचनाम्याचे काम युद्धपातळीवर सुरू करण्यात आले आहे.

मोठा वाघोदा बुद्रुक येथे नुकसानीची पाहणी करण्यासाठी कृषी विभागाच्या गव्हाने मॅडम, तलाठी मधुराज पाटील, राहुल काशिनाथ पाटील, ग्रामपंचायत अधिकारी हरीश तायडे, कोतवाल मुशिर तडवी यांच्यासह अनेक शेतकरी बांधव उपस्थित होते.

🙏 शेतकऱ्यांची तातडीच्या मदतीची मागणी

सततच्या नैसर्गिक संकटामुळे हवालदिल झालेल्या शेतकऱ्यांनी शासनाने तातडीने पंचनामे पूर्ण करून आर्थिक मदत जाहीर करावी, अशी मागणी केली आहे.