🚨🔥 भुसावळ अग्निशमन विभागावर गंभीर आरोप; “अधिकाऱ्यांनी पदाचा दुरुपयोग करून दिली फायर सेफ्टी प्रमाणपत्रे?”

SARDAR NETWORK 24×7 – DAINIK LATEST NEWS (सच आपकी जुबानी)  📍 भुसावळ प्रतिनिधी  | इम्रान खान : ✍️

भुसावळ नगरपालिका अग्निशमन विभागातील अधिकारी व कर्मचाऱ्यांनी अधिकार नसताना फायर सेफ्टी सर्टिफिकेट जारी करून पदाचा दुरुपयोग केल्याचा गंभीर आरोप समोर आला असून या प्रकरणाची चौकशी करण्याची मागणी सामाजिक तथा माहिती अधिकार कार्यकर्ते केदार सानप यांनी जिल्हाधिकारी रोहन घुगे यांच्याकडे केली आहे.

माहिती अधिकारातून प्राप्त झालेल्या कागदपत्रांच्या आधारे केदार सानप यांनी जिल्हाधिकारी रोहन घुगे यांची समक्ष भेट घेत तक्रार अर्ज सादर केला. या तक्रारीमुळे भुसावळ शहरातील अग्निशमन विभागाच्या कार्यपद्धतीवर गंभीर प्रश्नचिन्ह निर्माण झाले आहे.

🧯 तक्रारीनुसार, भुसावळ अग्निशमन विभागातील अधिकारी प्रशांत भोळे व संबंधित कर्मचाऱ्यांनी दि.२९ एप्रिल २०२५ रोजी क्रमांक ३४५ चे फायर सेफ्टी सर्टिफिकेट बियाणी फार्मसी कॉलेज, गट नं. ९६/१, मिरगव्हाण शिवार, जामनेर रोड, भुसावळ या संस्थेला दिले आहे. तसेच अशाच प्रकारची अनेक फायर सेफ्टी प्रमाणपत्रे संबंधित अधिकारी व कर्मचाऱ्यांनी जारी केल्याचा आरोप करण्यात आला आहे.

⚠️ विशेष म्हणजे, संबंधित कॉलेजमध्ये मोठ्या प्रमाणावर विद्यार्थी व प्राध्यापकांची वर्दळ असते. अशा ठिकाणी योग्य अधिकारांशिवाय किंवा नियमांचे पालन न करता फायर सेफ्टी प्रमाणपत्र देण्यात आले असल्यास भविष्यात एखादी दुर्घटना घडल्यास त्याला जबाबदार कोण? असा सवाल केदार सानप यांनी उपस्थित केला आहे.

📌 तक्रारीत नमूद करण्यात आले आहे की, फायर सेफ्टी सर्टिफिकेट देण्याचा अधिकार महाराष्ट्र शासनाने प्राधिकृत केलेल्या मालेगाव येथील फायर अँड इमर्जन्सी सर्व्हिसेस विभागाला दिलेला आहे. मात्र भुसावळ नगरपालिका अग्निशमन विभागातील अधिकारी व कर्मचाऱ्यांनी अधिकार नसताना प्रमाणपत्रे देऊन पदाचा दुरुपयोग केल्याचा आरोप करण्यात आला आहे.

🏢 याशिवाय नगरपालिका हद्दीत तसेच हद्दीबाहेरील अनेक इमारतींना देखील अशाच प्रकारे प्रमाणपत्रे देण्यात आल्याचा दावा तक्रारीत करण्यात आला आहे. त्यामुळे या संपूर्ण प्रकरणाची उच्चस्तरीय चौकशी करून दोषींवर कारवाई करण्यात यावी, अशी मागणी करण्यात आली आहे.

📝 केदार सानप यांनी आपल्या तक्रार अर्जात या प्रकरणाची सखोल चौकशी करून चौकशी अहवालाची प्रत उपलब्ध करून देण्याचीही मागणी जिल्हाधिकाऱ्यांकडे केली आहे.

🔥 या गंभीर आरोपांमुळे भुसावळ नगरपालिका अग्निशमन विभागात खळबळ उडाली असून आता जिल्हा प्रशासन यावर काय कारवाई करते याकडे सर्वांचे लक्ष लागले आहे.