🚨🌿 सावद्यात पोलिसांची धडक कारवाई!

SARDAR NETWORK 24×7 – DAINIK LATEST NEWS (सच आपकी जुबानी) 📍 सावदा (ता. रावेर) | प्रतिनिधी – मुबारक तडवी

रावेर तालुक्यातील सावदा पोलीस स्टेशनच्या हद्दीत अवैध गांजाची लागवड केल्याचा प्रकार उघडकीस आला असून सावदा पोलिसांनी धाड टाकत मोठी कारवाई केली आहे. या कारवाईत सुमारे ९३ गांजाची झाडे जप्त करण्यात आली असून एका व्यक्तीला अटक करण्यात आली आहे. या घटनेमुळे परिसरात मोठी खळबळ उडाली आहे.

🕵️‍♂️ गोपनीय माहितीवरून पोलिसांचा छापा

सावदा पोलिसांना मिळालेल्या गोपनीय माहितीच्या आधारे पोलीस निरीक्षक विशाल पाटील यांच्या मार्गदर्शनाखाली मंगळवार (दि. १० मार्च २०२६) रोजी दुपारी सुमारे ४ वाजता सावदा–फैजपूर मार्गावरील गुरुकुल इंग्लिश स्कूलजवळील बैरम बुवा देवस्थान परिसरात छापा टाकण्यात आला.

या ठिकाणी गट क्रमांक ४६३ मधील शेतात निलेश रमेश पाटील (वय ४०, रा. सावदा) यांनी अवैधपणे गांजाची लागवड केल्याची माहिती पोलिसांना मिळाली होती.

🌿 ९३ गांजाची झाडे जप्त

छाप्यादरम्यान पोलिसांना शेतात ९३ गांजाची झाडे आढळून आली, जी तात्काळ जप्त करण्यात आली. जप्त केलेल्या गांजाचे एकूण वजन सुमारे २८ किलो ५४० ग्रॅम असून त्याची अंदाजे किंमत १ लाख ९४ हजार ७२ रुपये असल्याचे सांगण्यात आले.

🧾 अधिकाऱ्यांच्या उपस्थितीत पंचनामा

या कारवाईदरम्यान कृषी अधिकारी राजेंद्र कोंडे, नायब तहसीलदार गणेश साळी, तलाठी रशीद तडवी तसेच मुक्ताईनगर येथील फॉरेन्सिक टीमच्या सदस्यांच्या उपस्थितीत पंचनामा करण्यात आला.

👮 पोलिसांची संयुक्त कारवाई

या कारवाईत सावदा पोलीस स्टेशनचे सहाय्यक पोलीस निरीक्षक विशाल पाटील यांच्या नेतृत्वाखाली फौजदार राहुल सानप, महसूल प्रशासनातील अधिकारी, कृषी विभागाचे प्रतिनिधी तसेच सावदा पोलीस स्टेशनचे पोलीस हेड कॉन्स्टेबल संजू चौधरी, पोलीस कॉन्स्टेबल राजेंद्र वैदकर, निलेश बाविस्कर, सुनील शेंदाळे, मनोज तडवी आणि बबन तडवी यांच्यासह गुरुरक्षक जवानांनी सहभाग घेतला.

⚖️ NDPS कायद्यांतर्गत कारवाई

या प्रकरणी सावदा पोलीस स्टेशनमध्ये गुन्हा दाखल करण्याची प्रक्रिया रात्री उशिरापर्यंत सुरू होती. आरोपीविरुद्ध NDPS (अमली पदार्थ प्रतिबंधक) कायद्यांतर्गत कारवाई करण्यात येत असून पुढील तपास पोलीस निरीक्षक विशाल पाटील यांच्या मार्गदर्शनाखाली सुरू आहे.

📢 दरम्यान, परिसरात अवैध अमली पदार्थांची लागवड व विक्री करणाऱ्यांवर पुढेही कठोर कारवाई सुरूच राहणार असल्याचा इशारा पोलिसांनी दिला आहे.