🚨 पेरणीनंतर घरी परतताना दुर्दैव!

SARDAR NETWORK 24×7 – DAINIK LATEST NEWS (सच आपकी जुबानी) 📍सोयगाव तालुका | प्रतिनिधी (अप्पा वाघ)

सोयगाव तालुक्यात वादळी वाऱ्यासह झालेल्या मुसळधार पावसामुळे तुटलेल्या मुख्य वीजवाहिनीच्या तारेमुळे एका शेतकऱ्याचा लाखमोलाचा बैल जागीच ठार झाल्याची हृदयद्रावक घटना रविवारी दुपारी घोसला शिवारातील जोगेश्वरी रस्त्यावर घडली. या दुर्घटनेत बैलगाडीत असलेल्या शेतकरी कुटुंबातील चार ते पाच जणांनी प्रसंगावधान राखत उड्या मारल्याने त्यांचे प्राण वाचले.

मिळालेल्या माहितीनुसार, शब्बीर रुस्तम तडवी यांची नांदगाव तांडा शिवारातील गट क्रमांक ७३ मध्ये सुमारे एक हेक्टर शेती आहे. रविवारी खरीप हंगामातील पेरणीचे काम पूर्ण करून ते आपल्या कुटुंबासह बैलगाडीतून घरी परतत होते. त्याचवेळी परिसरात जोरदार पाऊस आणि वादळी वाऱ्यामुळे मुख्य वीजवाहिनीची तार तुटून रस्त्यावर पडली होती.

🌧️ पावसामुळे रस्त्यावर पाणी साचलेले असताना बैलगाडी त्या मार्गाने जात होती. यावेळी बैलाचा पाय जिवंत विद्युत तारेच्या संपर्कात आला आणि त्याला जोरदार विजेचा धक्का बसला. यात बैलाचा जागीच मृत्यू झाला.

🙏 या दुर्घटनेत शब्बीर तडवी व त्यांच्या कुटुंबीयांनी वेळीच सतर्कता दाखवत बैलगाडीतून उड्या मारल्या. त्यामुळे मोठी जीवितहानी टळली. मात्र शेतीच्या कामासाठी अत्यंत महत्त्वाचा असलेला बैल मृत झाल्याने शेतकऱ्याचे सुमारे एक लाख रुपयांचे आर्थिक नुकसान झाले आहे.

🚜 खरीप हंगामाच्या सुरुवातीलाच बैल गमावल्याने पुढील शेतीची कामे कशी करावीत, असा गंभीर प्रश्न शब्बीर तडवी यांच्यासमोर उभा राहिला आहे. या घटनेमुळे परिसरातील शेतकऱ्यांमध्येही चिंता व्यक्त केली जात आहे.

👨‍🔧 घटनेची माहिती मिळताच महावितरणचे लाईनमन सूर्यवंशी तसेच पशुवैद्यकीय अधिकारी जोगदंड यांनी घटनास्थळी भेट देऊन पाहणी केली. महावितरणकडून घटनेचा पंचनामा करण्यात आला. मात्र, महसूल विभागाचा एकही अधिकारी घटनास्थळी पोहोचला नसल्याची नाराजी ग्रामस्थांनी व्यक्त केली.

💰 या दुर्घटनेत मोठे आर्थिक नुकसान झालेल्या शेतकरी शब्बीर रुस्तम तडवी यांना शासनाने तातडीने आर्थिक मदत द्यावी, अशी मागणी ग्रामस्थांकडून करण्यात येत आहे.