🚨 रेल्वे प्रवासादरम्यान घडलेली घटना, अल्पवयीन मुलीच्या अपहरण व लैंगिक अत्याचार प्रकरणी आरोपीला १० वर्षांची शिक्षा ⚖️

SARDAR NETWORK 24×7 – DAINIK LATEST NEWS (सच आपकी जुबानी)📍 खामगाव | प्रतिनिधी ✍️

अल्पवयीन मुलीचे अपहरण करून तिच्यावर लैंगिक अत्याचार केल्याच्या प्रकरणात खामगाव येथील जिल्हा व सत्र न्यायालयाने आरोपीस दोषी ठरवत १० वर्षांच्या सश्रम कारावासाची शिक्षा सुनावली आहे.

प्राप्त माहितीनुसार, वि. जिल्हा व सत्र न्यायाधीश क.२ खामगाव श्री. जी. बी. जाधव यांनी सत्र खटला क्रमांक १६/२०२३ मध्ये आरोपी राहुल रमेश पवार याच्याविरुद्ध निर्णय दिला. न्यायालयाने भारतीय दंड विधान व बालकांचे लैंगिक अत्याचारापासून संरक्षण (पॉक्सो) कायद्यांतर्गत विविध कलमांनुसार शिक्षा सुनावली.

⚖️ न्यायालयाने सुनावलेली शिक्षा

🔹 भा.दं.वि. कलम ३६३ अंतर्गत ३ वर्षे सश्रम कारावास व दंड
🔹 भा.दं.वि. कलम ३६६ अंतर्गत ५ वर्षे सश्रम कारावास व दंड
🔹 भा.दं.वि. कलम ३७६(२) अंतर्गत १० वर्षे सश्रम कारावास व दंड
🔹 पॉक्सो कायदा कलम ४ अंतर्गत १० वर्षे सश्रम कारावास व दंड

🚆 रेल्वे प्रवासादरम्यान घडली घटना

सदर घटना डिसेंबर २०२२ मध्ये रेल्वे प्रवासादरम्यान घडल्याची माहिती समोर आली आहे. फिर्यादी कुटुंबीयांसह प्रवास करीत असताना अल्पवयीन मुलगी बेपत्ता झाल्याने लोहमार्ग पोलीस ठाणे शेगाव येथे तक्रार दाखल करण्यात आली होती.

तपासादरम्यान रेल्वे स्टेशन परिसरातील CCTV फुटेज, पीडितेचा जबाब, वैद्यकीय अहवाल व इतर पुराव्यांच्या आधारे आरोपीविरुद्ध गुन्हा सिद्ध झाल्याचे न्यायालयाने नमूद केले.

👮 तपास व सरकारी पक्षाची बाजू महत्त्वाची

या प्रकरणाचा तपास एपीआय प्रभाकर मगर यांनी केला. सरकार पक्षातर्फे विशेष अतिरिक्त शासकीय अभियोक्ता कु. रजनी बावस्कार (सौ. भालेराव) यांनी काम पाहिले.

प्रकरणात एकूण ११ साक्षीदारांची साक्ष नोंदविण्यात आली. त्यामध्ये फिर्यादी, पीडिता, वैद्यकीय अधिकारी व तपास अधिकारी यांच्या साक्षी महत्त्वपूर्ण ठरल्या.

⚠️ दुसरा आरोपी निर्दोष मुक्त

प्रकरणातील दुसरा आरोपी संतोष गाठे याच्याविरुद्ध पुरेसा पुरावा सिद्ध न झाल्याने न्यायालयाने त्याची निर्दोष मुक्तता केली.

🚨 अल्पवयीन मुलींवरील गुन्ह्यांबाबत न्यायालयाने दिलेला हा निकाल महत्त्वपूर्ण मानला जात असून अशा प्रकारच्या गुन्ह्यांविरोधात कठोर संदेश दिला गेल्याची प्रतिक्रिया व्यक्त होत आहे.