SARDAR NETWORK 24×7 – DAINIK LATEST NEWS (सच आपकी जुबानी) 📍 सोयगाव, ता.२३ (अप्पा वाघ) :
सोयगाव तालुक्यात सध्या भीषण डिझेल टंचाई निर्माण झाली असून सर्वच पेट्रोल पंपांवर डिझेलसाठी वाहनांच्या लांबच लांब रांगा लागल्याचे चित्र दिसून येत आहे. गेल्या २४ तासांपासून अनेक ट्रॅक्टर, जीप, ट्रक व इतर वाहने पेट्रोल पंपांवर उभी असूनही डिझेल टँकर न आल्याने अनेक वाहनधारकांना रिकाम्या हाताने परतावे लागत आहे. ⛽🚜
पेट्रोल पंपावर डिझेल येणार असल्याची माहिती मिळताच शेतकरी व वाहनचालक मोठ्या प्रमाणावर पंपांकडे धाव घेत आहेत. परिणामी काही ठिकाणी वाहनांच्या रांगा तब्बल एक ते दीड किलोमीटरपर्यंत पोहोचल्याचे दिसून आले. तालुक्यातील जवळपास सर्वच पेट्रोल पंपांवर अशीच परिस्थिती निर्माण झाली आहे. 😟
🌾 खरीप हंगामावर संकटाचे सावट
सध्या खरीप हंगामाची तयारी सुरू असून शेती मशागतीची कामे वेगाने सुरू होण्याची वेळ असताना डिझेल टंचाईमुळे शेतकरी मोठ्या अडचणीत सापडले आहेत. आधुनिक व यांत्रिक शेतीमुळे अनेक शेतकऱ्यांनी बैलजोड्या विकून ट्रॅक्टरवर अवलंबून राहण्याचा पर्याय स्वीकारला आहे. मात्र ट्रॅक्टरलाच डिझेल मिळत नसल्याने मशागतीची कामे ठप्प होण्याची भीती व्यक्त केली जात आहे. 🌱🚜
तिखी येथील शेतकरी शेख नयूम यांनी सांगितले की, “शुक्रवारी रात्रीपासून आम्ही पेट्रोल पंपावर थांबलो होतो; मात्र रात्रभर जागूनही डिझेल मिळाले नाही. आता शेतीची कामे कशी करायची हा मोठा प्रश्न निर्माण झाला आहे.”
🚨 इंधनासाठी शेतकऱ्यांचा पंपांवर मुक्काम
गेल्या दोन दिवसांपासून डिझेल टंचाई अधिक तीव्र झाली असून अनेक शेतकरी वाहनांसह पेट्रोल पंपांवरच मुक्काम करत असल्याचे चित्र दिसून येत आहे. डिझेल मिळेल या आशेने रात्रभर थांबूनही अनेकांना निराश होऊन परतावे लागत आहे. 😢
📢 शासनाने तातडीने हस्तक्षेप करण्याची मागणी
डिझेल टंचाई कायम राहिल्यास खरीप हंगाम धोक्यात येण्याची भीती शेतकऱ्यांनी व्यक्त केली आहे. त्यामुळे शासनाने व तेल कंपन्यांनी तातडीने डिझेल पुरवठा सुरळीत करून शेतकऱ्यांना दिलासा द्यावा, अशी जोरदार मागणी तालुक्यातून होत आहे. ⚠️
