🎼🇮🇳 पाचोऱ्याच्या संगीत परंपरेचा अमेरिकेत डंका! 🌎🎤

SARDAR NETWORK 24×7 – DAINIK LATEST NEWS (सच आपकी जुबानी) 📍 पाचोरा तालुका प्रतिनिधी आबा सूर्यवंशी / मंदार तळणीकर

पाचोरा येथील संगीत क्षेत्रातील ज्येष्ठ संगीतकार, संगीत सुरमणी पंडित सुधाकर तळणीकर यांनी आपल्या संगीत साधनेच्या बळावर राज्यभरातील शेकडो विद्यार्थ्यांना घडवून संगीतविश्वात वेगळी ओळख निर्माण केली आहे. त्यांनी पुणे येथे स्थापन केलेल्या कलार्पण संगीत विद्यालयाच्या माध्यमातून तसेच त्यांचे सुपुत्र मंदार तळणीकर व केदार तळणीकर यांच्या सहकार्याने अनेक विद्यार्थ्यांना गायन, तबला वादन आणि हार्मोनियमचे प्रशिक्षण देत संगीताचा वारसा जपला आहे.

या संगीत परंपरेतून घडलेले अनेक शिष्य आज देश-विदेशात आपल्या कलेचा ठसा उमटवत आहेत. त्यापैकीच एक शिष्य अमेय बनसोड याने अमेरिकेत नोकरी, कुटुंब आणि व्यवसाय सांभाळत संगीताची आवड जपून आपल्या गुरूंचे नाव उज्ज्वल केले आहे.

🌟 अमेरिकेत भारतीय कलेसाठी व्यासपीठ

अमेरिकेतील कनेटिकट राज्यात वास्तव्यास असलेले सुधीर ओक आणि नमिता दांडेकर यांनी स्थापन केलेल्या “Hearts Full of Arts” या संस्थेमार्फत संगीत, नृत्य आणि नाट्य क्षेत्रातील कलाकारांना आपली कला सादर करण्यासाठी उत्कृष्ट व्यासपीठ उपलब्ध करून दिले आहे.

या संस्थेने यापूर्वीही स्थानिक कलाकारांच्या सहभागातून रत्नाकर मतकरी यांच्या गूढकथांवर आधारित ‘कथा-प्रकटन’, तसेच ‘गीत रामायण’ यांसारखे दर्जेदार कार्यक्रम यशस्वीरित्या सादर केले आहेत.

🎶 ‘दिलविल-प्यारव्यार’ कार्यक्रमाला उत्स्फूर्त प्रतिसाद

रविवार, ७ जून रोजी “प्रेम आणि प्रेमाचा प्रवास” या संकल्पनेवर आधारित हिंदी चित्रपटांतील गाजलेल्या गीतांचा ‘दिलविल-प्यारव्यार’ हा सुरेल कार्यक्रम सादर करण्यात आला. तीन पिढ्यांतील कलाकारांनी या कार्यक्रमात सहभाग घेतला.

या कार्यक्रमात अनुप्रिया कायंदे, स्वरा कायंदे, आरोही वग्गा, विनय सावंत, अनंत निमकर्डे, अमेय बनसोड आणि सुधीर ओक या गायकांनी जवळपास २५ लोकप्रिय गाणी सादर करून रसिकांची मने जिंकली.

💃 नृत्याविष्काराने रंगत वाढवली

निवडक गीतांवर नेहा पेंडसे यांच्या दिग्दर्शनाखाली अमी, अनुभा, देवर्षी, मल्लिका, मेधा, नेहा, सान्वी, सारा, श्रद्धा आणि वैदेही या नृत्यांगनांनी आकर्षक नृत्याविष्कार सादर केला. कार्यक्रमाचे ध्वनिसंयोजन यतीन राव यांनी अत्यंत प्रभावीपणे सांभाळले.

🎤 तीन महिन्यांच्या मेहनतीचे यश

सुधीर ओक यांनी सर्व गायकांकडून तब्बल तीन महिने नियमित तालमी करून घेत कार्यक्रमातील गाणी उत्कृष्टरीत्या सादर होण्यासाठी विशेष मेहनत घेतली. कार्यक्रमाची संपूर्ण संकल्पना एका सूत्रात बांधत नमिता दांडेकर यांनी खुमासदार हिंदी सूत्रसंचालन करून कार्यक्रमाला वेगळी उंची प्राप्त करून दिली.

👏 शंभर रसिक मंत्रमुग्ध

विविध वयोगटातील सुमारे शंभर रसिकांनी या दोन तासांच्या कार्यक्रमाचा आनंद घेतला. प्रत्येक गीताला उत्स्फूर्त दाद मिळाली. कार्यक्रमाचा समारोप अमेय बनसोड यांनी सादर केलेल्या लोकप्रिय ‘मितवा’ या गीताने झाला. या गीतावर सादर झालेल्या नृत्याविष्काराने उपस्थितांची मने जिंकत कार्यक्रमाची सांगता दणक्यात झाली.

🎼 गुरूंच्या संस्कारांची परदेशातही चमक

विशेष म्हणजे, अमेय बनसोड यांनी पुण्यातील **कलार्पण संगीत विद्यालयात संगीत सुरमणी पं. सुधाकर तळणीकर आणि मंदार तळणीकर यांच्याकडे गायनाचे शिक्षण घेतले आहे. त्यांच्या यशामुळे पाचोऱ्याच्या संगीत परंपरेचा गौरव अमेरिकेपर्यंत पोहोचल्याची भावना संगीतप्रेमींनी व्यक्त केली आहे. 🇮🇳🎵🌎