🚨 ‘एकाच ठिकाणी ठाण मांडून बसलेल्या’ पोलिस अधिकारी-कर्मचाऱ्यांच्या बदल्यांची मागणी!

SARDAR NETWORK 24×7 – DAINIK LATEST NEWS (सच आपकी जुबानी) 📍पाचोरा तालुका | प्रतिनिधी – आबा सूर्यवंशी

जळगाव जिल्हा पोलिस दलात प्रशासकीय कार्यकाळ पूर्ण झाल्यानंतरही काही पोलिस अधिकारी व कर्मचारी एकाच पोलिस ठाण्यात किंवा एकाच डिव्हिजनमध्ये कार्यरत असल्याचा आरोप करत, अशा अधिकारी-कर्मचाऱ्यांच्या सेवा कार्यकाळाची सखोल तपासणी करून नियमानुसार कारवाई करावी, अशी मागणी बल्लाळेश्वर फाऊंडेशनचे अध्यक्ष हरीभाऊ तुकाराम पाटील यांनी जिल्हा पोलिस अधीक्षकांकडे केलेल्या तक्रारी निवेदनातून केली आहे.

तक्रारीनुसार, जळगाव जिल्हा पोलिस दलातील काही अधिकारी व कर्मचारी प्रशासकीय कार्यकाळ संपुष्टात आल्यानंतरही ठराविक पोलिस ठाणे अथवा डिव्हिजनमध्ये कार्यरत असल्याचा दावा करण्यात आला आहे. वरिष्ठ स्तरावरून बदलीचे आदेश झाल्यानंतरही काही अधिकारी-कर्मचारी नियमांचे उल्लंघन करून त्याच ठिकाणी सेवा बजावत असल्याचा आरोप तक्रारीत करण्यात आला आहे.

🔎 ‘सेवा कार्यकाळाची तपासणी करा’

जिल्हा पोलिस अधीक्षक कार्यालयाच्या माध्यमातून संबंधित पोलिस अधिकारी व कर्मचाऱ्यांचा आजपर्यंतचा विविध पोलिस ठाणे व डिव्हिजनमधील सेवा कार्यकाळ तपासण्यात यावा, अशी मागणी करण्यात आली आहे.

तसेच वरिष्ठ स्तरावरून बदलीचे आदेश जारी झाले असतील आणि त्याचे पालन झाले नसेल, तर संबंधित अधिकारी-कर्मचाऱ्यांवर नियमानुसार कारवाई करण्यात यावी, अशी मागणीही निवेदनातून करण्यात आली आहे.

⚠️ राजकीय दबावाचा वापर होत असल्याचा आरोप

काही पोलिस कर्मचारी राजकीय वजनाचा वापर करून आपल्या तालुक्यातील किंवा जवळच्या अंतरावरील पोलिस ठाण्यांमध्येच बदली करून घेत असल्याचा आरोप तक्रारीत करण्यात आला आहे. विशेषतः पाचोरा-भडगाव तालुक्यात हा प्रकार अधिक असल्याचा दावा करण्यात आला आहे.

काही पोलिस कर्मचारी स्थानिक पातळीवरील विविध व्यवसाय अथवा राजकीय हस्तक्षेपासाठी आपल्या पदाचा आणि राजकीय संबंधांचा वापर करत असल्याचा आरोपही निवेदनात करण्यात आला आहे.

मात्र, या सर्व आरोपांची अधिकृत चौकशी होऊन वस्तुस्थिती समोर येणे आवश्यक असल्याचे तक्रारदारांनी म्हटले आहे.

💰 ‘चिरीमिरी’ आणि संगनमताचेही आरोप

तक्रारीत काही अधिकारी-कर्मचारी विभागातच प्रभाव निर्माण करून किंवा कथित ‘चिरीमिरी’च्या माध्यमातून बदलीच्या नियमांना बगल देत असल्याचे आरोप करण्यात आले आहेत.

तसेच वरिष्ठ पातळीवरून कार्यकाळ वाढविण्याचा कोणताही लेखी आदेश नसतानाही काही अधिकारी-कर्मचारी जुन्या नियुक्तीच्या ठिकाणीच सेवा बजावत असल्याचे दाखवून आस्थापना विभागातील संबंधित अधिकाऱ्यांशी संगनमत करून वेतन घेत असल्याचा गंभीर आरोप निवेदनात करण्यात आला आहे.

या आरोपांमुळे पोलिस प्रशासनातील बदली प्रक्रिया, सेवा कार्यकाळ आणि प्रशासकीय पारदर्शकतेबाबत प्रश्न उपस्थित करण्यात आले आहेत.

👮 जिल्ह्याबाहेर बदल्या करण्याची मागणी

प्रशासकीय कार्यकाळ पूर्ण झालेल्या तसेच बदलीच्या नियमांचे उल्लंघन करणाऱ्या पोलिस अधिकारी-कर्मचाऱ्यांची नियमानुसार जिल्ह्याबाहेर बदली करण्यात यावी, तसेच नियमबाह्य पद्धतीने सेवा सुरू असल्याचे आढळल्यास संबंधितांवर कायदेशीर कारवाई करावी, अशी मागणी तक्रारदारांनी केली आहे.

तसेच अशा प्रकरणांमध्ये चौकशी पूर्ण होईपर्यंत संबंधित अधिकारी-कर्मचाऱ्यांची तात्काळ मुख्यालयी रवानगी करण्याची मागणीही करण्यात आली आहे.

📋 जिल्हा पोलिस अधीक्षकांच्या भूमिकेकडे लक्ष

या संपूर्ण प्रकरणाची जिल्हा पोलिस अधीक्षकांनी गांभीर्याने दखल घेऊन संबंधित अधिकारी-कर्मचाऱ्यांचा नियुक्तीचा इतिहास, बदली आदेश, प्रशासकीय कार्यकाळ आणि प्रत्यक्ष सेवा ठिकाण यांची तपासणी करावी, अशी मागणी करण्यात आली आहे.

तक्रारीतील आरोपांची सत्यता तपासण्यासाठी अधिकृत चौकशी होऊन दोष आढळल्यास संबंधितांवर नियमानुसार कारवाई होईल का, याकडे आता पोलिस दलातील अधिकारी-कर्मचारी तसेच नागरिकांचे लक्ष लागले आहे.

दरम्यान, तक्रारीतील आरोपांची स्वतंत्रपणे अधिकृत पुष्टी झालेली नसून, चौकशीनंतरच त्यातील वस्तुस्थिती स्पष्ट होणार आहे.