📚✨ जामनेरच्या जिल्हा ग्रामीण युवा साहित्य संमेलनात कवी प्रवीण महाजन यांची कविता गाजली ✨📖

SARDAR NETWORK 24×7 – DAINIK LATEST NEWS (सच आपकी जुबानी) एरंडोल | प्रतिनिधी : राजधर महाजन

जामनेर येथे आयोजित जिल्हा ग्रामीण युवा साहित्य संमेलनात एरंडोल येथील राष्ट्रीय साहित्य संघाचे संयोजक तसेच संवेदनशील कवी प्रवीण आधार महाजन यांच्या कवितेने रसिकांची मने जिंकली. ‘चला पुस्तक वाचूया’ या प्रभावी कवितेला उपस्थित श्रोत्यांकडून भरभरून दाद मिळत दोन वेळा सादरीकरणाची संधी मिळाली आणि कवितेला मानाचा ‘वन्स मोअर’ प्राप्त झाला.

या साहित्य संमेलनाच्या व्यासपीठावर संमेलनाध्यक्ष सुप्रसिद्ध साहित्यिक व समीक्षक प्रा. डॉ. फुला बागुल, जामनेर तालुका साहित्य संस्कृती मंडळाचे अध्यक्ष तथा संयोजक डी. डी. पाटील, ज्येष्ठ साहित्यिक प्रा. बी. एन. चौधरी, प्रा. डॉ. एस. आर. महाजन, प्रा. मंगला महाजन, निवृत्त मुख्याध्यापक प्रतिभा नरवाडे, निवृत्त मुख्याध्यापक डी. एस. चौधरी, सचिव गोरक्ष सूर्यवंशी यांच्यासह अनेक मान्यवर उपस्थित होते.

कवी प्रवीण महाजन यांच्या कवितेतील वाचनसंस्कृतीचा संदेश, सामाजिक भान आणि तरुणाईला साद घालणारा आशय यामुळे उपस्थित मान्यवर, साहित्यिक तसेच विद्यार्थ्यांनी कवितेचे विशेष कौतुक केले आणि उत्स्फूर्त प्रतिसाद दिला.

हे जिल्हा ग्रामीण युवा साहित्य संमेलन मराठी भाषा विभाग, महाराष्ट्र शासन, महाराष्ट्र राज्य साहित्य व संस्कृती मंडळ, मुंबई तसेच जामनेर तालुका साहित्य संस्कृती मंडळ यांच्या संयुक्त विद्यमाने उत्साहात संपन्न झाले. संमेलनास उत्तर महाराष्ट्रातील अनेक नामवंत साहित्यिक, कवी व लेखकांची विशेष उपस्थिती लाभली होती.

या प्रसंगी कवी प्रवीण आधार महाजन यांचा संमेलनाध्यक्ष प्रा. डॉ. फुला बागुल यांच्या हस्ते सन्मानचिन्ह व गौरवपत्र देऊन यथोचित सन्मान करण्यात आला. 🎖️🌸

कार्यक्रमाचे सूत्रसंचालन जामनेर येथील ‘आई हॉस्पिटल’च्या संचालिका डॉ. मोनाली महाजन यांनी प्रभावीपणे केले, तर आभार प्रदर्शन प्रतिभा नरवाडे यांनी मानले.