🚨⚠️ सावद्यात धक्कादायक प्रकार

SARDAR NETWORK 24×7 – DAINIK LATEST NEWS (सच आपकी जुबानी) 📍 सावदा (ता. रावेर) | प्रतिनिधी – मुबारक तडवी

रावेर तालुक्यातील सावदा शहरातील गौसिया नगर परिसरात २१ वर्षीय विवाहित महिलेला पतीने मारहाण करून शिवीगाळ करत “तलाक, तलाक, तलाक” असे तीन वेळा उच्चारून घराबाहेर काढल्याची धक्कादायक घटना घडली आहे. या प्रकरणी पीडित महिलेने सावदा पोलीस ठाण्यात तक्रार दाखल केली असून पतीसह सासरच्या सदस्यांवर कारवाईची मागणी करण्यात आली आहे.

👩‍👦 तीन वर्षांपूर्वी झाला विवाह

मिळालेल्या माहितीनुसार, सना नदीम खान (वय २१, रा. गौसिया नगर, सावदा, ता. रावेर, जि. जळगाव) हिचा विवाह सुमारे तीन वर्षांपूर्वी नदीम नजीर खान याच्याशी समाजाच्या रितीरिवाजांनुसार झाला होता. या दाम्पत्याला सालार नावाचा एक वर्षाचा मुलगा आहे.

तक्रारीनुसार, पती मालवाहतूक रिक्षा चालवून कुटुंबाचा उदरनिर्वाह करत असल्याचे सांगण्यात आले आहे.

💰 माहेरहून ३ लाख रुपये आणण्याचा दबाव

लग्नानंतर सना ही सासरच्या संयुक्त कुटुंबात राहत होती. मात्र काही काळानंतर सासरच्या मंडळींकडून माहेरहून धंद्यासाठी ३ लाख रुपये आणण्याचा वारंवार दबाव टाकला जात असल्याचा आरोप तिने केला आहे.

पैसे आणण्यास नकार दिल्यावर पतीकडून मारहाण, शिवीगाळ आणि मानसिक छळ केला जात असल्याचेही महिलेने तक्रारीत नमूद केले आहे.

⚠️ आधार कार्डच्या कारणावरून बोलावून मारहाण

दरम्यान रमजान महिन्यात पतीने तिला काही दिवस माहेरी पाठवले होते. त्यानंतर ९ मार्च रोजी आधार कार्ड शोधण्याच्या कारणावरून तिला सावद्यातील भाड्याच्या घरात परत बोलावण्यात आले.

दुपारी सुमारे ३ वाजण्याच्या सुमारास ती घरात गेल्यानंतर पतीने कोणतेही कारण नसताना शिवीगाळ करत मारहाण केल्याचा आरोप महिलेने केला आहे.

🛑 शेजाऱ्यांसमोरच तीन वेळा ‘तलाक’

भांडणाचा आवाज ऐकून शेख वाजिद शेख हमीद हे शेजारी घरात आले. त्यांच्या समोरच पती नदीम खान याने “तलाक, तलाक, तलाक” असे तीन वेळा उच्चारून बेकायदेशीररित्या तलाक दिल्याचे सांगितले, असे महिलेने तक्रारीत म्हटले आहे.

त्यानंतर घराला कुलूप लावून पती निघून गेला, असेही तिने सांगितले.

📞 वडिलांना फोन करून सांगितला प्रकार

घडलेल्या प्रकारानंतर महिलेने वडिलांना फोन करून माहिती दिली. वडील घटनास्थळी येऊन तिला माहेरी घेऊन गेले. कुटुंबीयांशी चर्चा केल्यानंतर अखेर तिने सावदा पोलीस ठाण्यात अधिकृत तक्रार दाखल केली.

👮 पोलीस तपास सुरू

या प्रकरणी पतीसह सासरच्या काही सदस्यांविरोधात कारवाई करण्याची मागणी करण्यात आली असून सावदा पोलीस पुढील तपास करीत आहेत.

📢 दरम्यान, या घटनेमुळे सावदा परिसरात खळबळ उडाली असून महिलांवरील अत्याचार आणि बेकायदेशीर ‘ट्रिपल तलाक’च्या घटनांवर कठोर कारवाई करण्याची मागणी होत आहे.