🏠📱 ‘शासन आपल्या दारी’चा जिवंत अनुभव एरंडोलमध्ये ज्येष्ठ नागरिक व दिव्यांगांच्या घरी जाऊन तहसील प्रशासनाने केले हयात प्रमाणपत्र ऑनलाईन

SARDAR NETWORK 24×7 – DAINIK LATEST NEWS (सच आपकी जुबानी) एरंडोल तालुका प्रतिनिधी : ✍️ राजधर महाजन

‘शासन आपल्या दारी’ या उपक्रमाचा प्रत्यक्ष आणि सकारात्मक प्रत्यय एरंडोल शहरात पाहायला मिळाला. तांत्रिक अडचणी, आजारपण आणि शारीरिक व्याधींमुळे हयात प्रमाणपत्र सादर करू न शकणाऱ्या ज्येष्ठ नागरिक व दिव्यांग लाभार्थ्यांसाठी तहसील प्रशासनाने चक्क शोधमोहीम राबवून त्यांच्या घरी जाऊन ऑनलाईन नोंदणी पूर्ण केली. या कौतुकास्पद उपक्रमामुळे अनेक लाभार्थ्यांना मोठा दिलासा मिळाला आहे. 👵🧓♿

शासकीय नियमांनुसार संजय गांधी निराधार योजना व इतर निवृत्तीवेतन योजनांच्या लाभार्थ्यांना ३१ जानेवारीपर्यंत ‘बेनेफिशरी सत्यापन अॅप’द्वारे डिजिटल हयात प्रमाणपत्र सादर करणे बंधनकारक होते. मात्र तांत्रिक ज्ञानाचा अभाव, मोबाईल अॅप वापरण्यातील अडचणी तसेच आजारपणामुळे अनेक वृद्ध, विधवा महिला व दिव्यांग लाभार्थी हे प्रमाणपत्र वेळेत सादर करू शकले नव्हते. ही बाब लक्षात येताच प्रशासनाने थेट लाभार्थ्यांपर्यंत पोहोचण्याचा निर्णय घेतला. 📲📝

🚶‍♂️🏘️ कार्यालयात न येऊ शकणाऱ्यांच्या घरीच पूर्ण केली प्रक्रिया

तहसील प्रशासनाच्या पथकाने एरंडोल शहरातील विविध गल्लीबोळांत जाऊन लाभार्थ्यांचा शोध घेतला. ज्यांना तहसील कार्यालयात येणे शक्य नव्हते, अशा लाभार्थ्यांचे हयात प्रमाणपत्र मोबाईल अॅपद्वारे जागेवरच ऑनलाईन पूर्ण करण्यात आले. यामुळे अनेक कुटुंबांना दिलासा मिळाला. 👍

या मोहिमेत इंदिरा गांधी राष्ट्रीय वृद्धापकाळ निवृत्ती वेतन योजना, इंदिरा गांधी राष्ट्रीय विधवा निवृत्ती वेतन योजना तसेच इंदिरा गांधी राष्ट्रीय दिव्यांग निवृत्ती वेतन योजना अंतर्गत लाभ घेणाऱ्या लाभार्थ्यांचा समावेश होता.

ही संपूर्ण मोहीम उपविभागीय अधिकारी मनीष कुमार गायकवाड व तहसीलदार गोपाळ पाटील यांच्या मार्गदर्शनाखाली राबविण्यात आली. तर निराधार योजना विभागाचे नायब तहसीलदार अमोल बन व त्यांच्या पथकाने शहरात प्रत्यक्ष जाऊन ही जबाबदारी पार पाडली. 👨‍💼👩‍💼

🌼🙏 लाभार्थ्यांकडून प्रशासनाचे कौतुक

कार्यालयात तासनतास रांगेत उभे राहण्याचा त्रास वाचल्याने ज्येष्ठ नागरिक, विधवा महिला व दिव्यांग लाभार्थ्यांनी प्रशासनाप्रति कृतज्ञता व्यक्त केली. तसेच ‘शासन आपल्या दारी’ या उपक्रमाचे सर्व स्तरातून स्वागत होत असून, अशाच पद्धतीने पुढेही प्रशासनाने संवेदनशीलतेने काम करावे, अशी अपेक्षा व्यक्त करण्यात येत आहे. 🌟

एरंडोल तहसील प्रशासनाच्या या उपक्रमामुळे खऱ्या अर्थाने शासन जनतेच्या दारात पोहोचल्याची भावना नागरिकांमध्ये निर्माण झाली आहे. 🤝✨