🦁🔥 छत्रपती संभाजी महाराज स्मारकात शौर्यप्रतिमेची उभारणी होणार;

SARDAR NETWORK 24×7 – DAINIK LATEST NEWS (सच आपकी जुबानी) पाचोरा तालुका प्रतिनिधी : ✍️ आबा सूर्यवंशी

पाचोरा शहरातील भडगाव रोडवरील छत्रपती संभाजी महाराज चौकातील नियोजित स्मारक परिसरात स्वराज्यरक्षक छत्रपती संभाजी महाराजांचा राज्याभिषेक दिन अत्यंत भक्तिभाव व उत्साहात साजरा करण्यात आला. या कार्यक्रमास कार्यसम्राट आमदार किशोर आप्पा पाटील, उपनगराध्यक्ष किशोर बारवकर, बाजार समितीचे सभापती तथा नगरसेवक गणेश पाटील यांची प्रमुख उपस्थिती लाभली.

दि. १६ जानेवारी हा दिवस शिवपुत्र, स्वराज्यरक्षक छत्रपती संभाजी महाराजांचा राज्याभिषेक दिन म्हणून राज्यभर साजरा केला जातो. या निमित्ताने पाचोरा-भडगाव मतदारसंघाचे लोकप्रिय आमदार किशोर आप्पा पाटील यांच्या हस्ते छत्रपती संभाजी महाराजांच्या प्रतिमेस माल्यार्पण व पूजन करण्यात आले. या कार्यक्रमाचे आयोजन मराठा सेवा संघाचे जिल्हा उपाध्यक्ष सुनील पाटील यांच्या मार्गदर्शनाखाली करण्यात आले होते.

🦁 स्मारकात शंभू महाराजांची शौर्यसंपन्न प्रतिमा उभारणार 🦁

या कार्यक्रमावेळी सकल मराठा समाजाच्या वतीने आमदार किशोर आप्पा पाटील यांना निवेदन देत छत्रपती संभाजी महाराजांचा पुतळा लवकरात लवकर उभारावा, अशी आग्रहाची मागणी करण्यात आली. यावर प्रतिक्रिया देताना आमदार पाटील यांनी सांगितले की, शासनाकडून परवानगीची प्रक्रिया सुरू आहे. मात्र तोपर्यंत तात्पुरत्या स्वरूपात स्मारकात छत्रपती संभाजी महाराजांच्या शौर्याचे प्रतीक असलेली, वाघाचा जबडा फोडून दात मोजत असलेली सुमारे ४ ते ५ फूट उंच प्रतिमा मे महिन्यात साजऱ्या होणाऱ्या संभाजी महाराज जयंतीपूर्वी उभारण्याचे मी शब्द देतो, असे ठाम आश्वासन दिले.

यावेळी आमदारांनी मूर्तिकाराशी मोबाईलवरून थेट चर्चा करत प्रतिमा निर्मितीबाबत निर्देशही दिले, त्यामुळे उपस्थित शंभूप्रेमींमध्ये समाधान व उत्साहाचे वातावरण निर्माण झाले. आमदारांनी दिलेल्या या आश्वासनाचे शिवशंभू प्रेमी व सकल मराठा समाजाच्या वतीने स्वागत करून आभार मानण्यात आले.

🎖️ सैन्य व बीएसएफमध्ये निवड झालेल्या युवकांचा सत्कार 🎖️

या प्रसंगी बीएसएफ व भारतीय सैन्य दलात निवड झालेल्या ग्रामीण भागातील दोन युवकांचा आमदार किशोर आप्पा पाटील यांच्या हस्ते सन्मान व गौरव करण्यात आला. या उपक्रमामुळे उपस्थितांमध्ये अभिमानाची भावना निर्माण झाली.

👥 उपस्थित मान्यवर

या कार्यक्रमास माजी नगरसेवक दत्ता बोरसे पाटील, राहुल गायकवाड, मराठा सेवा संघाचे तालुकाध्यक्ष राहुल बोरसे, संभाजी ब्रिगेडचे तालुकाध्यक्ष जिभाऊ पाटील, पीएसआय कृष्णा घायाळ, ज्येष्ठ पत्रकार आबा सूर्यवंशी, किशोर रायसाकडा, निलेश शेलार, बाबाजी ठाकरे, उमेश एरंडे, एस. ए. पाटील, सुधाकर पाटील, जे. व्ही. पाटील, संजय पाटील, विजू जाधव, नितीन पाटील, सचिन पाटील, मनोज पाटील, शरद पाटील, सचिन भोसले यांच्यासह मराठा सेवा संघ, संभाजी ब्रिगेड, उदनराजे समर्थक गट, शिवशंभू प्रेमी व सकल मराठा समाजाचे असंख्य कार्यकर्ते उपस्थित होते.