🚨💥 अमळनेर पालिकेतील घनकचरा व्यवस्थापनात मोठा घोटाळा?

SARDAR NETWORK 24×7 – DAINIK LATEST NEWS (सच आपकी जुबानी) अमळनेर | तालुका प्रतिनिधी : मुन्ना शेख

अमळनेर नगरपरिषदेतील घनकचरा व्यवस्थापन विभागात मोठा आर्थिक घोटाळा उघडकीस आल्याचा आरोप कामगारांनी केला आहे. गेल्या २०२२ पासून सुमारे ६० कंत्राटी कामगारांचा भविष्य निर्वाह निधी (PF) जमा करण्यात आलेला नसल्याची गंभीर तक्रार कामगारांनी थेट भविष्य निर्वाह निधी आयुक्तांकडे निवेदनाद्वारे केली आहे.

यामुळे नगरपरिषदेच्या ठेक्यांमधील कामगारांच्या हक्कांवर गदा आल्याचा आरोप होत असून प्रशासन आणि लोकप्रतिनिधींच्या भूमिकेवरही प्रश्नचिन्ह उपस्थित झाले आहे.

🗑️ घनकचरा व्यवस्थापनाचा ठेका; पण कामगारांचे हक्क धोक्यात

मिळालेल्या माहितीनुसार, अमळनेर नगरपरिषदेचा घनकचरा व्यवस्थापनाचा ठेका ‘रामदास बाळू पवार – ग्रीन वे एम्पायर’ या ठेकेदाराला देण्यात आला आहे. या ठेक्यांतर्गत सुमारे ६० कामगार शहरात स्वच्छता व कचरा व्यवस्थापनाचे काम करतात.

मात्र कामगारांचा आरोप आहे की २०२२ पासून आजपर्यंत त्यांच्या पगारातून कपात होणारा भविष्य निर्वाह निधी ठेकेदाराने जमा केलेलाच नाही.

या संदर्भात २०२५ मध्ये तत्कालीन मुख्याधिकाऱ्यांकडे तक्रार करण्यात आली होती. त्यावेळी मुख्याधिकाऱ्यांनी ठेकेदाराला पीएफ जमा करण्याचे आदेशही दिले होते. परंतु ठेकेदाराने त्या आदेशांकडेही दुर्लक्ष केल्याचा आरोप कामगारांनी केला आहे.

⚠️ किमान वेतन कायद्याचेही उल्लंघन?

कामगारांच्या म्हणण्यानुसार, किमान वेतन कायद्याचेही खुलेआम उल्लंघन होत आहे.

🔴 घंटागाडी चालकांना केवळ ९ हजार रुपये मासिक वेतन दिले जाते.

🔴 क्लिनरना ७ हजार रुपये इतकाच पगार मिळतो.

कामगारांनी सांगितले की, ठेकेदाराचा पर्यवेक्षक खलील शहा साध्या वहीवर पेन्सिलीने पगाराची नोंद करतो आणि नंतर पेनाने कामगारांकडून सह्या घेतो, ज्यामुळे संपूर्ण व्यवहारावर संशय निर्माण झाला आहे.

😡 तक्रार केल्यास कामावरून काढण्याच्या धमक्या

कामगारांनी आरोप केला की, कोणताही कामगार तक्रार केल्यास त्याला कामावरून काढण्याच्या धमक्या दिल्या जातात.

याशिवाय वरिष्ठ अधिकारी चौकशीसाठी आले असता PF यादीत असलेली नावे आणि प्रत्यक्ष काम करणारे कामगार वेगळे असल्याचा आरोपही करण्यात आला आहे, ज्यामुळे या प्रकरणात मोठा आर्थिक गैरव्यवहार झाल्याची शक्यता व्यक्त होत आहे.

कामगारांनी सांगितले की, गेल्या काही वर्षांत अनेकदा लोकप्रतिनिधी, नगरसेवक आणि अधिकाऱ्यांकडे तक्रारी केल्या, मात्र कोणतीही ठोस कारवाई करण्यात आली नाही.

📄 कामगारांच्या प्रमुख मागण्या

कामगारांनी दिलेल्या निवेदनात खालील मागण्या करण्यात आल्या आहेत:

✅ गेल्या चार वर्षांचा PF थकबाकीसह व्याजासह तातडीने जमा करावा

✅ आयडी कार्डवरील कामगारांची नावे आणि PF स्लिपमधील नावांची पडताळणी करावी

✅ PF आयुक्तांनी प्रत्यक्ष कामगारांना भेटून चौकशी करावी

✅ तक्रार करणाऱ्या कामगारांना संरक्षण द्यावे

✅ भ्रष्टाचार करणाऱ्या ठेकेदारावर फौजदारी गुन्हा दाखल करावा

✅ ठेकेदाराच्या देयकातून कामगारांचा PF वसूल करावा

📑 अनेक कामगारांच्या सह्या; वरिष्ठ अधिकाऱ्यांकडे निवेदन

या निवेदनावर राहुल बिऱ्हाडे, योगेश चव्हाण, हेमंत नाईक, संदीप बैसाणे, अविनाश पाटील, शंकर मोरे, गोकुळ मोरे, फिरोज खाटीक, राजेश धाप, जगदीश संदानशीव, दीपक बिऱ्हाडे, दिनकर बिऱ्हाडे, संजय संदानशीव, संतोष बिऱ्हाडे, बबलू बिऱ्हाडे, पवन बिऱ्हाडे आदी कामगारांच्या सह्या आहेत.

या निवेदनाच्या प्रती भविष्य निर्वाह निधी आयुक्त अनिलकुमार प्रीतम, सहाय्यक आयुक्त मोहित दीक्षित, सहाय्यक कामगार आयुक्त, जिल्हाधिकारी, पोलीस अधीक्षक तसेच अमळनेर नगरपरिषदेचे मुख्याधिकारी यांना देण्यात आल्या आहेत.

🏛️ मुख्याधिकाऱ्यांची प्रतिक्रिया

या प्रकरणावर प्रतिक्रिया देताना अमळनेर नगरपरिषदेचे मुख्याधिकारी गणेश शिंदे यांनी सांगितले की:

“घनकचरा व्यवस्थापनात काम करणाऱ्या कामगारांचा PF ठेकेदाराने भरणे बंधनकारक आहे. याबाबत ठेकेदाराला नोटीस देऊन मुदत दिली जाईल. अन्यथा त्याच्यावर कायदेशीर कारवाई केली जाईल.”

अमळनेर नगरपरिषदेतील घनकचरा व्यवस्थापन विभागातील या गंभीर आरोपांमुळे कामगारांच्या हक्कांबाबत मोठा प्रश्न निर्माण झाला आहे. आता प्रशासन या प्रकरणात कठोर चौकशी करून जबाबदारांवर कारवाई करणार का, याकडे सर्वांचे लक्ष लागले आहे.