🐝⚠️ मधमाश्यांच्या हल्ल्यात १९ वर्षीय तरुणाचा दुर्दैवी मृत्यू! 😢

SARDAR NETWORK 24×7 – DAINIK LATEST NEWS (सच आपकी जुबानी) अमळनेर तालुका प्रतिनिधी : ✍️📍 मुन्ना शेख

अमळनेर तालुक्यातील लोंढवे येथे शेतातील मधमाश्यांचे पोळे काढण्यासाठी गेलेल्या १९ वर्षीय तरुणाचा मधमाशांच्या हल्ल्यात मृत्यू झाल्याची दुर्दैवी घटना २० रोजी सायंकाळी घडली. या घटनेमुळे परिसरात हळहळ व्यक्त होत आहे.

🐝 पोळे काढताना घडली दुर्घटना

मृत तरुणाचे नाव राहुल कैलास पाटील (वय १९) असे आहे. धुळे–अमळनेर रस्त्यालगत असलेल्या स्वतःच्या शेतात असलेले मधमाश्यांचे पोळे काढण्यासाठी तो सायंकाळी गेला होता.

मधमाशा चावू नयेत म्हणून राहुलने तोंडावर प्लास्टिकची पिशवी डोक्यातून घालून घट्ट बांधून घेतली होती. त्यानंतर त्याने मध काढण्यास सुरुवात केली. मात्र अचानक मधमाशा चवताळल्या आणि त्याच्यावर जोरदार हल्ला चढवला.

🏃 पळता पळता पडला… प्रकृती गंभीर

मधमाशांच्या हल्ल्यापासून बचाव करण्यासाठी राहुल पळू लागला. मधमाशा तोंडावर येऊ नयेत म्हणून त्याने पिशवी घट्ट धरून ठेवली. मात्र पळता पळता तो खाली पडला.

घटनेची माहिती मिळताच ग्रामस्थांनी त्याला तातडीने खासगी रुग्णालयात दाखल केले. प्राथमिक उपचारानंतर प्रकृती गंभीर झाल्याने त्याला ग्रामीण रुग्णालयात हलविण्यात आले. मात्र तेथील डॉक्टरांनी तपासून त्याला मृत घोषित केले.

🚨 पोलिसांत अकस्मात मृत्यूची नोंद

या प्रकरणी त्याच्या चुलत भावाने अमळनेर पोलीस स्टेशनला खबर दिली. पोलिसांनी अकस्मात मृत्यूची नोंद केली असून पुढील तपास हेडकॉन्स्टेबल काशिनाथ पाटील करीत आहेत.

⚠️ सावधगिरीचा इशारा

ग्रामीण भागात मधमाश्यांचे पोळे काढताना योग्य संरक्षण साधने व तज्ज्ञांचे मार्गदर्शन घेणे आवश्यक असल्याचे या घटनेतून अधोरेखित झाले आहे.

🔴 लोंढवे गावात घडलेल्या या घटनेने संपूर्ण परिसरात शोककळा पसरली आहे.