🏃‍♀️✨ महिलांसाठी ‘लेडीज इक्वॅलिटी रन’ची जोरदार तयारी!

SARDAR NETWORK 24×7 – DAINIK LATEST NEWS (सच आपकी जुबानी) भुसावळ तालुका प्रतिनिधी : ✍️ इम्रान खान

भुसावळ स्पोर्ट्स अँड रनर्स असोसिएशनतर्फे १२ एप्रिल रोजी आयोजित करण्यात येणाऱ्या ‘बिसारा लेडीज इक्वॅलिटी रन’ स्पर्धेच्या पार्श्वभूमीवर महिला धावपटूंना योग्य सराव मिळावा यासाठी विशेष सराव सत्रांची सुरुवात करण्यात आली आहे.

शहरातील कृष्णचंद्र सभागृहाशेजारील मोकळ्या मैदानावर प्रत्येक मंगळवार, गुरुवार आणि रविवारी सकाळी ६ ते ७ या वेळेत हे सराव सत्र आयोजित केले जाणार असून सर्वांसाठी नि:शुल्क ठेवण्यात आले आहेत.

या सराव सत्रांची सुरुवात मंगळवार, ३ मार्च रोजी सकाळी ६ वाजता करण्यात आली. यावेळी जळगावच्या महापौर दीपमाला काळे या प्रमुख पाहुण्या म्हणून उपस्थित होत्या. स्वतः उत्कृष्ट धावपटू आणि सायकलपटू असलेल्या महापौर दीपमाला काळे यांच्या उपस्थितीमुळे महिला धावपटूंमध्ये मोठा उत्साह पाहायला मिळाला.

🏃‍♀️ नारळ फोडून सराव सत्राला सुरुवात

कार्यक्रमाच्या सुरुवातीला सहभागी धावपटूंसाठी वार्म-अप व्यायाम प्रकार घेण्यात आला. त्यानंतर महापौर दीपमाला काळे आणि स्पर्धेतील लहान धावपटू अवनी मंगेश चंदन यांच्या हस्ते नारळ फोडून कार्यक्रमास विधिवत सुरुवात करण्यात आली.

यानंतर असोसिएशनच्या नियमित महिला धावपटूं सोबत नवोदित स्पर्धकांनी धावण्यास सुरुवात केली. या धावण्यामध्ये अग्रस्थानी महापौर दीपमाला काळे, डॉ. नीलिमा नेहेते आणि डॉ. चारुलता पाटील होत्या.

या रनचे शिस्तबद्ध नियमन प्रशांत वंजारी यांनी केले. धावपटूंनी मैदानापासून डी.आर.एम. कार्यालय – लाल चर्च – लोको शेड रोड असा मार्ग पार करत पुन्हा मैदानावर परत येत ३ किलोमीटर अंतर पूर्ण केले. त्यानंतर सर्वांनी स्ट्रेचिंग व्यायाम करून सत्राचा समारोप केला.

🌸 महापौरांचा सत्कार

या प्रसंगी डॉ. नीलिमा नेहेते आणि डॉ. चारुलता पाटील यांनी महापौर दीपमाला काळे यांचे स्वागत करून त्यांचा सत्कार केला. तसेच उत्कृष्ट धावपटू असलेल्या संजय मोती यांचे स्वागत प्रा. प्रविण फालक यांच्या हस्ते करण्यात आले.

💬 महापौरांचे मनोगत

आपल्या मनोगतात दीपमाला काळे यांनी सलग सहाव्यांदा खास महिलांसाठी ‘लेडीज इक्वॅलिटी रन’ स्पर्धा आयोजित केल्याबद्दल भुसावळ स्पोर्ट्स अँड रनर्स असोसिएशनचे कौतुक केले आणि सर्व महिलांचे अभिनंदन केले.

तसेच त्यांनी आपल्या फिटनेस प्रवासातील अनुभव सांगताना बाहेरगावी झालेल्या मॅरेथॉन स्पर्धांदरम्यान भुसावळच्या धावपटूं सोबतच्या आठवणींनाही उजाळा दिला. भविष्यातही या स्पर्धेसाठी वेळोवेळी उपस्थित राहण्याची ग्वाही त्यांनी दिली.

👥 मान्यवरांची उपस्थिती

कार्यक्रमाच्या अध्यक्षस्थानी प्रा. प्रविण फालक होते. कार्यक्रमाचे सूत्रसंचालन व आभार प्रदर्शन प्रविण पाटील यांनी केले.

कार्यक्रमाच्या यशस्वीतेसाठी छोटू गवळी, प्रशांत वंजारी, प्रशांत चौधरी, मंगेश चंदन, प्रविण वारके, सुयश न्याती, संजय तिवारी आणि राजेंद्र घाटे यांचे विशेष सहकार्य लाभले.

📌 महिलांच्या आरोग्य, फिटनेस आणि सशक्तीकरणाचा संदेश देणाऱ्या ‘लेडीज इक्वॅलिटी रन’ स्पर्धेकडे आता भुसावळकरांचे लक्ष लागले आहे.