📚🏠 मराठी गौरव दिनानिमित्त भुसावळात अनोखा उपक्रम! 📚🏠

SARDAR NETWORK 24×7 – DAINIK LATEST NEWS (सच आपकी जुबानी)  भुसावळ तालुका प्रतिनिधी | इम्रान खान

मराठी भाषा गौरव दिनानिमित्त भुसावळ शहरात साहित्यिक, कला व सांस्कृतिक क्षेत्रातील मान्यवरांच्या घरांना ओळख देणारा अनोखा उपक्रम राबविण्यात आला. परदेशात प्रचलित असलेल्या संकल्पनेला मराठमोळे स्वरूप देत नगराध्यक्षा गायत्री ताई भंगाळे यांच्या पुढाकारातून हा अभिनव उपक्रम सुरू करण्यात आला आहे.

परदेशात नामवंत साहित्यिक, कलाकार किंवा सांस्कृतिक क्षेत्रातील व्यक्तींच्या घरासमोर निळ्या रंगाची पाटी लावून त्या ठिकाणाला ‘हेरिटेज’ स्वरूपाची ओळख दिली जाते. त्यावर त्या व्यक्तीचे नाव तसेच जन्म-मृत्यूची माहिती नमूद केलेली असते. ऐतिहासिक वारसा जतन करण्यासाठी ही संकल्पना प्रभावी मानली जाते.

याच संकल्पनेला स्वदेशी आणि मराठमोळा रंग देत भुसावळमध्ये प्रथमच हा उपक्रम राबविण्यात आला. मराठी भाषा गौरव पंधरवडा व महिला दिनाच्या निमित्ताने सुप्रसिद्ध साहित्यिक सीमा भारंबे यांच्या भुसावळ येथील निवासस्थानी निळी पाटी लावून या उपक्रमाचा शुभारंभ करण्यात आला.

🎭 साहित्य-कला क्षेत्रातील मान्यवरांची उपस्थिती

या कार्यक्रमाचे संकल्पना व नियोजन समन्वयक प्रा. उत्तम सुरवाडे यांनी केले. यावेळी ललिता चौधरी, सीमा भारंबे, सायली चौधरी, प्रा. उत्तम सुरवाडे यांच्यासह कला, साहित्य आणि सांस्कृतिक क्षेत्रातील अनेक मान्यवर उपस्थित होते.

📖 जिल्ह्यातील साहित्यिकांपर्यंत पोहोचणार उपक्रम

या उपक्रमांतर्गत पुढील टप्प्यात सांगवी येथील ज्ञानपीठ पुरस्कार विजेते साहित्यिक भालचंद्र नेमाडे तसेच फैजपूर येथील कविवर्य भानू चौधरी यांच्या निवासस्थानालाही अशा प्रकारच्या पाट्या लावण्यात येणार आहेत.

तसेच भुसावळ शहरातील साहित्यिक बाबासाहेब के. नारखेडे, मधुसाळी, नाट्यकलावंत श्रीकांत जोशी, विरेंद्र पाटील, राजेंद्र जावळे, जगदीश पाटील, काशीनाथ भारंबे, रमाकांत भालेराव यांच्यासह इतर लेखक व कलावंतांच्या घरांवरही टप्प्याटप्प्याने अशा पाट्या लावण्यात येणार असल्याची माहिती प्रा. उत्तम सुरवाडे यांनी दिली.

या उपक्रमामुळे भुसावळ शहरातील साहित्यिक व सांस्कृतिक वारसा जतन होण्यास मदत होईल, तसेच नवीन पिढीला मराठी साहित्यिकांच्या कार्याची ओळख होईल, अशी भावना उपस्थितांनी व्यक्त केली. ✨📚