🥀🍚 भुसावळ तालुक्यातील रेशन दुकानदारांवर उपासमारीची वेळ!

SARDAR NETWORK 24×7 – DAINIK LATEST NEWS (सच आपकी जुबानी) भुसावळतालुका प्रतिनिधी : ✍️ इम्रान खान

भुसावळ तालुक्यातील शासनमान्य रास्त धान्य दुकानदार बांधव सध्या अत्यंत गंभीर आर्थिक संकटाला सामोरे जात असून त्यांच्यावर अक्षरशः उपासमारीची वेळ आली आहे. गेल्या दीड वर्षापासून कोणताही खंड न पडता शिधापत्रिकाधारकांना मोफत धान्याचे वेळेत वितरण करणाऱ्या रेशन दुकानदारांना गेल्या 6 ते 7 महिन्यांपासून त्यांच्या हक्काचे कमिशन मिळालेले नाही, त्यामुळे सर्वत्र तीव्र संताप व्यक्त केला जात आहे.

🍛 शासनाची योजना, दुकानदारांवर अन्याय

सर्वसामान्य नागरिकांना रास्त दरात अन्नधान्य उपलब्ध व्हावे, यासाठी शासनामार्फत गेल्या अनेक वर्षांपासून तांदूळ, गहू, साखर, डाळी आदी धान्याचे वितरण शासनमान्य रास्त धान्य दुकानांद्वारे केले जाते. सध्या शासनच धान्य थेट दुकानापर्यंत पोहोचवत असून त्याचे वितरणाची जबाबदारी पूर्णतः रेशन दुकानदारांवर आहे.

🧾 कमिशनवरच चालतो उदरनिर्वाह

या संपूर्ण व्यवस्थेसाठी शासनाकडून रेशन दुकानदारांना कमिशन दिले जाते. या कमिशनमधूनच दुकानदार
• ई-पॉस मशीनवर काम करणाऱ्या कर्मचाऱ्यांचा पगार,
• दुकानाचे भाडे,
• वीज बिल,
• वाहतूक व इतर दैनंदिन खर्च
भागवत असतात. मात्र कमिशनच वेळेत न मिळाल्याने दुकानदारांचा आर्थिक डोलारा कोलमडून पडला आहे.

💻 ऑनलाईन व्यवस्था असूनही कमिशन रखडले

धान्यवाटपाची संपूर्ण प्रक्रिया सध्या ऑनलाईन असताना देखील रेशन दुकानदारांना त्यांच्या हक्काचे कमिशन वेळेत मिळत नसल्याने प्रशासनाच्या कार्यपद्धतीवर प्रश्नचिन्ह उपस्थित होत आहे. प्रशासनाकडे याबाबत विचारणा केली असता “अनुदान उपलब्ध नाही” असे कारण पुढे करण्यात येत असल्याचे दुकानदारांनी सांगितले.

📆 जुलै ते जानेवारी कमिशन थकीत

दुकानदारांच्या माहितीनुसार, काही दिवसांपूर्वी केवळ मे व जून महिन्याचे कमिशन अदा करण्यात आले, मात्र जुलै 2025 पासून जानेवारी 2026 पर्यंतचे कमिशन अद्याप थकीत आहे.
या परिस्थितीत कामगारांचे पगार, दुकानाचा खर्च आणि कुटुंबाचा उदरनिर्वाह कसा करायचा? असा गंभीर प्रश्न दुकानदारांसमोर उभा ठाकला आहे.

📢 तातडीने दखल घेण्याची मागणी

या संपूर्ण प्रकरणाची शासन व संबंधित प्रशासनाने तात्काळ गंभीर दखल घ्यावी आणि थकीत कमिशन लवकरात लवकर अदा करावे, अन्यथा तीव्र आंदोलनाचा मार्ग स्वीकारावा लागेल, असा इशारा रेशन दुकानदार बांधवांकडून दिला जात आहे.