🔴 कोर्ट परिसरात अवैध गावठी कट्ट्यासह महिला अटकेत

SARDAR NETWORK 24×7 – DAINIK LATEST NEWS (सच आपकी जुबानी) भुसावळ | प्रतिनिधी | इम्रान खान

भुसावळ शहरात अवैध शस्त्र बाळगण्याच्या प्रकारावर भुसावळ शहर पोलिसांनी तात्काळ आणि धाडसी कारवाई करत एका महिलेस अटक केली आहे. कोर्टाच्या बाहेरील सार्वजनिक रस्त्यावर संशयास्पद स्थितीत उभी असलेल्या महिलेकडून गावठी कट्टा (अग्नीशस्त्र) मॅगझीनसह जप्त करण्यात आला असून, तिच्याकडील दुचाकी वाहनही पोलिसांनी ताब्यात घेतले आहे.

पोलिसांनी दिलेल्या माहितीनुसार, दि. 14 जानेवारी 2026 रोजी दुपारी सुमारे 2.34 वाजता भुसावळ शहर पोलिस स्टेशनला पोलीस निरीक्षक उद्धव डमाले यांना गुप्त बातमीदारामार्फत माहिती मिळाली होती की, कोर्टाच्या बाहेरील भुसावळ–यावल मार्गावरील सार्वजनिक ठिकाणी एका सुझुकी एक्सिस 125 मोटरसायकलमध्ये अवैध शस्त्र ठेवले आहे.

या माहितीच्या आधारे पोलीस निरीक्षकांच्या आदेशानुसार म.पो.कॉ./3044 दिपाली रामलखन यादव यांच्यासह पोलिसांचे पथक तात्काळ घटनास्थळी दाखल झाले. घटनास्थळी पोहोचल्यावर रस्त्याच्या कडेला एक महिला पांढऱ्या व पिस्ता रंगाच्या सुझुकी एक्सिस 125 (क्रमांक MH 19 EK 6221) मोटरसायकलजवळ संशयास्पद अवस्थेत उभी असल्याचे दिसून आले.

पोलिसांनी तिला ताब्यात घेत पंचांना घटनास्थळी बोलावून पंचासमक्ष महिलेची व वाहनाची झडती घेतली. झडतीदरम्यान मोटरसायकलच्या डिक्कीतून एक गावठी कट्टा मॅगझीनसह आढळून आला. यावेळी सदर महिलेकडे अग्नीशस्त्र बाळगण्याचा कोणताही परवाना नसल्याचे स्पष्ट झाले.

अटक करण्यात आलेल्या महिलेची ओळख सुषमा अशोक धामणे (वय 32 वर्षे, व्यवसाय – मजुरी, रा. तापीनगर, एमएसईबी ऑफिससमोर, प्लॉट नं. 3, भुसावळ) अशी झाली आहे.
पोलिसांनी पंचनामा करून घटनास्थळीच खालील मुद्देमाल जप्त केला आहे –
▪ 01 गावठी कट्टा मॅगझीनसह (अंदाजे किंमत ₹20,000)
▪ 01 सुझुकी एक्सिस 125 मोटरसायकल (अंदाजे किंमत ₹60,000)
एकूण जप्त मुद्देमालाची किंमत सुमारे ₹80,000 इतकी आहे.

या प्रकरणी भुसावळ शहर पोलिस ठाण्यात दाखल गुन्हा नोंद रजिस्टर नंबर 0004/2026 अन्वये भारतीय शस्त्र अधिनियम 1959 चे कलम 3 व 25 अंतर्गत गुन्हा दाखल करण्यात आला असून पुढील तपास सुरू आहे.

शहरातील सार्वजनिक ठिकाणी अवैध शस्त्र बाळगण्याच्या घटनांवर कठोर कारवाईचा इशारा देत, भुसावळ शहर पोलिसांच्या या कारवाईचे नागरिकांकडून कौतुक केले जात आहे.