🤝🌙 हिंदू युवकांकडून रमजाननिमित्त इफ्तार पार्टीचे आयोजन 🤝🌙

SARDAR NETWORK 24×7 – DAINIK LATEST NEWS (सच आपकी जुबानी)  भुसावळ | तालुका प्रतिनिधी : इम्रान खान

भुसावळ शहराजवळील साकेगाव येथे सामाजिक सलोखा आणि बंधुभावाचे प्रेरणादायी उदाहरण पाहायला मिळाले. हिंदू युवकांनी पुढाकार घेत मुस्लिम बांधवांसाठी पवित्र रमजान महिन्यानिमित्त इफ्तार पार्टीचे आयोजन केले. या उपक्रमामुळे गावात एकात्मता आणि भाईचाऱ्याचा संदेश देण्यात आला.

मिळालेल्या माहितीनुसार, मॉर्निंग सीसी ग्रुपतर्फे डॉ. कैलास ठाकरे, अजय चौधरी आणि राहुल चौधरी यांनी पुढाकार घेत हा कार्यक्रम आयोजित केला होता. साकेगावातील बालूमिया परिसरात मोठ्या उत्साहात इफ्तार पार्टी पार पडली.

🌍 ३२ जाती-धर्मांचे लोक गुणगोविंदाने

साकेगाव हे गाव ३२ जाती-धर्मांच्या लोकांनी एकत्र गुणगोविंदाने राहणारे गाव म्हणून ओळखले जाते. येथे विविध सण-उत्सव एकत्र साजरे करण्याची परंपरा आहे. हिंदू समाजाची दिंडी निघाल्यास मुस्लिम बांधव तिचे स्वागत करतात, तर मुस्लिम समाजाच्या कार्यक्रमात हिंदू बांधवही मोठ्या उत्साहाने सहभागी होतात.

आजच्या काळात लहान-सहान कारणांवरून दोन समाजांमध्ये तेढ निर्माण होत असताना साकेगावातील हिंदू युवकांनी पुन्हा एकदा एकात्मतेचा आदर्श घालून दिला.

🤝 भाईचारा वाढविण्याचा संदेश

यावेळी बोलताना डॉ. कैलास ठाकरे यांनी सांगितले की, गावात सौहार्द टिकून राहावे, आपसातील भाईचारा वाढावा आणि माणुसकीच्या नात्याने प्रत्येकाने एकमेकांच्या सुख-दुःखात सहभागी व्हावे हा या इफ्तार पार्टीचा मुख्य उद्देश आहे.

हिंदू युवकांनी इफ्तार पार्टीचे आयोजन केल्याबद्दल मुस्लिम बांधवांनी आनंद व्यक्त करत हा उपक्रम कौतुकास्पद असल्याचे सांगितले. अशा प्रकारचे कार्यक्रम समाजात सलोखा टिकवण्यासाठी काळाची गरज असल्याचेही मत व्यक्त करण्यात आले.

👥 मोठ्या संख्येने उपस्थिती

या कार्यक्रमाला मौलाना फिरोज उमरी, जगदीश वळवी, रमजान पटेल, पियुष पाटील, जाकीर पटेल, वासेफ पटेल, अलाउद्दीन शेख, अन्सार पटेल, रियाज पटेल, मोसिन पटेल, मजीद शेख, दानिश शेख, पप्पू पटेल, आसिफ पटेल यांच्यासह अनेक समाजबांधव उपस्थित होते.

यावेळी युवक, लहान मुले तसेच गावातील नागरिकांनी मोठ्या संख्येने सहभाग घेत भाईचारा आणि एकात्मतेचा संदेश दिला.

📌 या उपक्रमामुळे साकेगावात सामाजिक सलोखा आणि धार्मिक सौहार्दाचे सुंदर चित्र पाहायला मिळाले, ज्याचे सर्वत्र कौतुक होत आहे.