🚨 पिंपळगाव हद्दीत अवैध धंद्यांचा सुळसुळाट; पोलिसांच्या भूमिकेवर गंभीर प्रश्नचिन्ह! 📰

SARDAR NETWORK 24×7 – DAINIK LATEST NEWS (सच आपकी जुबानी)  📝 पाचोरा तालुका प्रतिनिधी | आबा सूर्यवंशी

📍 पाचोरा तालुक्यातील पिंपळगाव (हरेश्वर) हे वारकऱ्यांचे श्रद्धास्थान म्हणून ओळखले जात असले, तरी सध्या या परिसरात अवैध व्यवसायांनी अक्षरशः मुळे घट्ट रोवली असल्याचे चित्र समोर येत आहे.

🚫 पिंपळगाव पोलिस ठाण्याच्या हद्दीतील सातगाव डोंगरी, शिंदाड, वरखेडी, कुऱ्हाड, लोहारा, आंबे, वडगाव आदी गावांमध्ये सट्टा, मटका, जुगार, देशी-विदेशी दारू विक्री, तसेच अवैध रेती वाहतूक यांसारख्या बेकायदेशीर धंद्यांचा उघडपणे धुमाकूळ सुरू असल्याची माहिती समोर येत आहे.

💰 या अवैध धंद्यांना काही अधिकारी व कर्मचाऱ्यांचे कथित संरक्षण असून हप्ते वसुलीचा मोठा रॅकेट सुरू असल्याच्या चर्चा परिसरात रंगल्या आहेत. मागील ५ ते १० वर्षांपासून ही परिस्थिती कायम असल्याचा आरोप स्थानिकांकडून केला जात आहे.

📢 या संदर्भात अनेक सामाजिक कार्यकर्त्यांनी पिंपळगाव परिक्षेत्रातील अवैध व्यवसाय बंद करण्यासाठी वारंवार आवाज उठवला आहे. पाचोरा उपविभागीय पोलिस अधिकारी, जळगाव जिल्हा पोलिस अधीक्षक तसेच नाशिक विभागाच्या वरिष्ठ अधिकाऱ्यांकडे लेखी तक्रारी देऊनही ठोस कारवाई होत नसल्याची खंत व्यक्त केली जात आहे.

📰 विशेष म्हणजे, या विषयावर बातम्या प्रकाशित करणाऱ्या पत्रकारांना पोलिस ठाण्यात बोलावून दबाव आणण्याचे प्रकार घडत असल्याचेही समोर आले आहे.

⚠️ अवैध व्यवसायांवर कारवाईच्या नावाखाली केवळ दिखाऊ (थातूर-मातूर) कारवाई केली जाते, ज्यामुळे वरिष्ठ अधिकाऱ्यांची दिशाभूल आणि जनतेची फसवणूक होत असल्याचा आरोप आहे.

🎴 येणाऱ्या आखाजी सणाच्या पार्श्वभूमीवर जुगार अड्ड्यांना तोंडी परवानगी दिली जात असल्याचीही चर्चा आहे, ज्यामुळे परिस्थिती अधिक गंभीर बनत आहे.

😟 या सर्व प्रकारांमुळे परिसरातील तरुण पिढी व्यसनाधीन होत असून, गरीब कुटुंबांचे संसार उद्ध्वस्त होत असल्याचे चित्र आहे. अनेक वेळा पीडितांच्या तक्रारी नोंद न करता त्यांना ताटकळत ठेवले जाते, तर आर्थिक फायदा दिसणाऱ्या प्रकरणांमध्येच तत्परता दाखवली जाते, अशी नाराजी व्यक्त होत आहे.

🚺 याचदरम्यान, महिलांवरील अत्याचार आणि विनयभंगाच्या गंभीर घटनांमध्येही योग्य कारवाई न झाल्याने संताप वाढला आहे. अखेर पीडितांनी आमदार किशोर पाटील यांची भेट घेऊन संबंधित पोलिस अधिकाऱ्यांविरोधात पुराव्यांसह तक्रार केली आहे.

⚖️ एकूणच पिंपळगाव (हरेश्वर) परिसरात कायदा व सुव्यवस्था केवळ नावालाच उरल्याची भावना नागरिकांमध्ये निर्माण झाली आहे. विविध शासकीय विभागांवर नियंत्रण नसल्याने अधिकारी मुजोर, जनता हतबल आणि अवैध व्यावसायिक शिरजोर झाल्याची तीव्र नाराजी व्यक्त होत आहे.

📣 या पार्श्वभूमीवर काही सामाजिक कार्यकर्ते व पत्रकारांनी १४ एप्रिल रोजी पाचोरा प्रांताधिकारी कार्यालयासमोर उपोषण करण्याचा इशारा दिला असून, संबंधित पोलिस अधिकाऱ्याची तात्काळ बदली करण्याची मागणी जोर धरत आहे.

🚨 श्रद्धास्थान असलेल्या पिंपळगाव परिसरात वाढती गुन्हेगारी आणि प्रशासनाची कथित निष्क्रियता यामुळे नागरिकांमध्ये तीव्र असंतोष निर्माण झाला असून, लवकरच मोठ्या आंदोलनाची शक्यता व्यक्त केली जात आहे.