🚨 भरदिवसाची दहशत : गावठी पिस्तुलाचा धाक दाखवून 1.5 लाखांची लूट!

Dainik Latest News. ✍️ मोठा वाघोदा (ता.रावेर) प्रतिनिधी | मुबारक तडवी

रावेर तालुक्यातील सावदा शहराजवळ भरदिवसा घडलेल्या धक्कादायक घटनेत कुख्यात गुंड अज्जू डॉन बऱ्हाणपूरवाला आणि त्याच्या साथीदारांनी गावठी पिस्तुलाचा धाक दाखवत दीड लाख रुपये लुटल्याची घटना उघडकीस आली आहे. या प्रकरणी सावदा पोलिसांनी गुन्हा दाखल केला असून परिसरात मोठी खळबळ उडाली आहे.

कसा घडला प्रकार?

मिळालेल्या माहितीनुसार, भुसावळ येथील साजीद शेख अकबर हे आपले मित्र बबलू खान अय्यूब खान यांच्यासोबत 27 ऑगस्ट रोजी सायंकाळी साडेचार वाजेच्या सुमारास टायरांची विक्री करून मिळालेली दीड लाख रुपयांची रोकड घेऊन दुचाकीने भुसावळकडे जात होते.

सावदा शहराबाहेर पिंपरुड रस्त्यावरील स्मशानभूमीजवळ अचानक पांढऱ्या रंगाच्या तवेरा कारमधून अज्जू डॉन, तौसीफ (पूर्ण नाव अज्ञात) आणि त्यांचे तीन अनोळखी साथीदार आले. त्यांनी दुचाकी अडवून गावठी बंदुकीचा धाक दाखवला. यावेळी अज्जू डॉन याने जिवे मारण्याची धमकी देत रोकड हिसकावून घेतली आणि सर्वजण कारने पसार झाले.

पोलिसात गुन्हा दाखल

या प्रकरणी फिर्यादी साजीद शेख अकबर यांच्या तक्रारीवरून सावदा पोलिस ठाण्यात गुन्हा क्रमांक 211/2025 नोंदविण्यात आला आहे. आरोपींवर भारतीय न्याय संहिता सन 2023 अंतर्गत कलम
310(2), 311, 115(2), 351(2)(3), 352 तसेच शस्त्र अधिनियम 1959 चे कलम 3/25 प्रमाणे गुन्हा दाखल करण्यात आला आहे.

पुढील तपास

या गंभीर गुन्ह्याचा तपास उपविभागीय पोलीस अधिकारी अनिल बडगुजर यांच्या मार्गदर्शनाखाली सपोनि विशाल पाटील, उपनिरीक्षक अमोल गर्जे व राहूल सानप करीत आहेत.

या घटनेनंतर सावदा शहर व परिसरात भीतीचे वातावरण निर्माण झाले असून पोलिसांनी आरोपींचा शोध घेण्यासाठी चोख मोहीम हाती घेतली आहे.

आरोपींच्या मुसक्या आवळण्यासाठी पोलिसांची मोहीम

या धाडसी लुटीनंतर परिसरात भीतीचे वातावरण पसरले असून आरोपींना पकडण्यासाठी सावदा पोलीसांनी शोधमोहीम सुरू केली आहे. पोलिसांच्या पथकांनी संभाव्य ठिकाणी धाडी टाकण्यास सुरुवात केली असून सीमाभागातील पोलीस ठाण्यांनाही अलर्ट करण्यात आले आहे.

“गुन्हेगार कितीही कुख्यात असले तरी त्यांना कायद्याच्या कचाट्यात आणल्याशिवाय आम्ही थांबणार नाही,” असा निर्धार पोलिस अधिकाऱ्यांनी व्यक्त केला.